مولانا حنیف جالندھری پنجاب قرآن بورڈ کے نئے چیئرمین تعینات

 لاہور: متحدہ علماء بورڈ کے بعد پنجاب قرآن بورڈ کے چیئرمین مولانا راغب نعیمی کو بھی انکے عہدے سے ہٹا دیا گیا جبکہ مولانا حنیف جالندھری کو نیا چیئرمین تعینات کر دیا گیا۔

پنجاب حکومت نے متحدہ علما بورڈ کے چیئرمین حافظ طاہر محمود اشرفی کو انکے عہدے سے ہٹانے کے بعد اب پنجاب قرآن بورڈ کے چیئرمین کو بھی تبدیل کر دیا ہے۔

پنجاب قرآن بورڈ کے چیئرمین کے عہدے سے ہٹائے جانے والے ڈاکٹر راغب نعیمی کو حمزہ شہباز شریف کے وزیراعلیٰ بننے کے دوران یہ ذمہ داری سونپی گئی تھی، اس سے قبل یہ ذمہ داری صاحبزادہ حامد رضا کے پاس تھی جنہیں اب متحدہ علما بورڈ پنجاب کا چیئرمین بنایا جا چکا ہے۔

ڈاکٹر راغب حسین نعیمی جامعہ نعیمیہ لاہور کے سربراہ اور مسلم لیگ ن کے حمایتی ہیں، ان کے نواز شریف خاندان سے فیملی تعلقات ہیں جبکہ وہ پنجاب اوقاف کے ملازم بھی ہیں۔

وزیراعلیٰ پنجاب کی ہدایات پر ڈاکٹر راغب حسین نعیمی کی جگہ اب وفاق المدارس العربیہ کے سیکریٹری جنرل مولانا حنیف جالندھری کو نیا چیئرمین قرآن بورڈ پنجاب تعینات کیا گیا ہے جس کا باقاعدہ نوٹی فکیشن بھی جاری کر دیا گیا ہے۔