کراچی پولیس سے مبینہ مقابلہ ڈاکو اپنے ہی ساتھی کی گولی لگنے سے ہلاک

---

نیو کراچی پولیس سے مبینہ مقابلے کے دوران ایک ڈاکو اپنے ہی ساتھی کی گولی لگنے سے ہلاک ہوگیا جبکہ اس کا ساتھی موقع سے فرار ہونے میں کامیاب ہوگیا۔

اس حوالے سے ایس ایچ او نیو کراچی زاہد لودھی نے بتایا کہ سیکٹر الیون ڈی کی اندرونی گلیوں میں موٹر سائیکل سوار ڈاکو شہریوں سے لوٹ مار کر رہے تھے کہ پولیس پارٹی موقع پر پہنچ گئی جسے دیکھ کر ڈاکوؤں نے فائرنگ شروع کر دی جبکہ پولیس کی جانب سے بھی جوابی فائرنگ کی گئی۔

تاہم اس دوران ایک ڈاکو اپنے ہی ساتھیوں میں سے کسی کی فائرنگ سے گولی لگ کر ہلاک ہوگیا جبکہ اس کی دیگر 2 ساتھی موقع سے فرار ہونے میں کامیاب ہوگئے۔

پولیس نے ہلاک ڈکیت کے قبضے سے نائن ایم ایم پستول ، لوڈ میگزین ، نقدی ، 3 موبائل فون اور پرس برآمد کرلیا۔

پولیس کے مطابق ہلاک ڈکیت صابر منگھوپیر کا رہائشی اور اس کا کرمنل ریکارڈ بھی سامنے آیا ہے جو کہ سعید آباد پولیس کے ہاتھوں گرفتار ہو کر جیل بھی چکا ہے۔

پولیس نے ڈکیت کی لاش ضابطے کی کارروائی کے لیے سول عباسی شہید اسپتال منتقل کر دی ۔