برطانوی تنظیم ’’المہاجرون‘‘ کا ملالہ کے خلاف فتویٰ لینے کا اعلان

اسلام آ باد: برطانیہ کی تنظیم ’’المہاجرون‘‘ نے کہا ہے کہ  30 نومبرکولال مسجد سے ملالہ کے خلاف فتویٰ جاری کیا جائے گا جبکہ لال مسجد کے ترجمان مولانا عامر صدیقی نے ایسی کسی بھی خبرکی تردید کی ہے۔

تنظیم کا کہنا ہے کہ ملالہ یوسف زئی امریکی صدربراک اوباما کو اپنا آئیڈل مانتی ہیں اور پاکستان میں شریعت کے نفاذ کو ضروری نہیں سمجھتیں اسی لئے ہماری تنظیم پاکستان آکر لال مسجد کی انتظامیہ کے تعاون سے ایک پریس کانفرنس منعقد کرے گی جس میں ملالہ کے خلاف فتویٰ جاری کیا جائے گا۔

اس تنظیم نے اپنی ویب سائٹ “شریعت فار پاکستان” پر ملالہ کے خلاف ایک مضمون بھی شائع کیا ہے جس کا عنوان ہے “ملالہ یوسف زئی کے مگرمچھ آنسوؤں کا یقین نہ کیا جائے”۔

برطانوی عالم انجم چوہدری نے کہا کہ ہم ملالہ کے پیچھے تلواریں لے کر بھاگنے والے نہیں بلکہ ہم اس مسئلے کو اس لئے منظر عام پر لانا چاہتے ہیں کیونکہ ملالہ کا نام لے کر مسلمانوں کے دشمنوں نے یہ تاثر پیدا کرنے کی کوشش کی ہے کہ مسلمان تعلیم حاصل کرنے کے خلاف ہیں۔