16مارچ کے بعد ایک دن بھی حکومت میں نہیں رہیں گے،خورشید شاہ

پشاور: وفاقی وزیر برائے مذہبی امور سید خورشید شاہ نے کہا ہے کہ 16 مارچ کو اسمبلی کی آئینی مدت پوری ہوجائے گی جس کے بعد ایک دن بھی حکومت میں نہیں رہیں گے۔

پشاور میں سینئر صوبائی وزیر بشیر بلور کی شہادت پر ان کے اہل خانہ سے تعزیت کے بعد میڈیا سے بات کرتے ہوئے خورشید شاہ نے کہا کہ احتجاج سب کا حق ہے۔ طاہر القادری اگر لانگ مارچ کرنا چاہتے ہیں تو انہیں نہیں روکیں گے لیکن ڈاکٹر طاہر القادری نظام کی تبدیلی سے آگاہ نہیں۔

وفاقی وزیر کا کہنا تھا کہ انتخابات کے لئے ملک کی تمام سیاسی جماعتیں اپنی راہوں کا تعین کررہی ہیں۔ 18ویں ترمیم کے تحت خود مختار الیکشن کمیشن کا قیام عمل میں آچکا ہے۔ نگراں  سیٹ اپ کے لئے تمام جماعتوں سے مشاورت کے بعد فیصلہ کیا جائے گا۔

خورشید شاہ کا کہنا تھا کہ تمام مسائل کا حل مذاکرات ہی ہیں لیکن انسانیت کے قاتلوں سے مذاکرات نہیں ہوسکتے۔ ملک میں امن کے لئے حکومت بھی مذاکرات کا خیر مقدم کرتی ہے لیکن اب تک طالبان کا کوئی رہنما سامنے نہیں آیا۔