پی آئی اے کو ماہانہ 3 ارب 25 کروڑ روپے خسارے کا سامنا

 کراچی:  پی آئی اے کے قائمقام چیف ایگزیکٹو آفیسر نیر حیات نے جمعرات کو مقامی ہوٹل میں صحافیوں سے غیر رسمی بات چیت کرتے ہوئے کہا ہے کہ پاکستان انٹرنیشنل ایئرلائن کو گزشتہ سال ماہانہ سوا3ارب روپے خسارے کا سامنا رہا جبکہ بینکوں سے لیے گئے قرضے اور سود کی ادائیگیوں کے باعث بھی ایئرلائن کومالی مشکلات رہیں۔

نیر حیات نے کا کہنا تھا کہ پی آئی اے کا خسارہ ماضی کے قرضوں اور خلیجی ایئرلائینوں کی وجہ سے ہورہا ہے، پی آئی اے ایک منزل سے دوسری منزل کیلیے پروازیں چلاتی ہے، خلیجی ایئرلائین مسافروں کو پوائنٹ سے منزل کے فارمولے پرآپریٹ کرتی ہیں۔ انھوں نے کہاکہ خلیجی ایئرلائینوں سے پی آئی اے کو پہنچنے والے نقصان سے حکومت کو آگاہ کردیا گیا ہے، انھوں نے مزید کہا کہ پی آئی اے کے امریکا اور یورپ کے لیے روٹس خسارے میں چل رہے ہیں تاہم پی آئی اے کے آپریٹنگ ماڈل کو تبدیل کرنے کی کوشش کررہے ہیں۔

علاوہ ازیں نیر حیات کا کہنا تھا کہ پی آئی اے کو پورپی ممالک کے متعدد روٹس پرخسارے کا سامنا کرنا پڑرہا ہے تاہم ادارے کو انتظامی طورپر بہتر انداز میں چلانے کیلیے ٹھوس حکمت عملی بھی تیار کی گئی ہے انھوں نے کہاکہ حج آپریشن کیلیے مزید طیارے لیزپر حاصل کیے جائیں گے تاہم حج آپریشن کیلیے تیاریاں جاری ہیں۔