امریکی کھلاڑی نے پوگو اسٹک پر لگاتار پانچ کاریں پھلانگنے کا نیا ریکارڈ بنالیا

امریکی پوگو اسٹک کھلاڑی ٹائلر فلپس نے پوگو اسٹک پر پانچ کاروں کو عبور کرکے ایک نیا ریکارڈ قائم کیا ہے۔ فوٹو: یوکے نیوز

---

امریکی نوجوان پوگو اسٹک جمپر نے اپنی اسٹک پر لگاتار پانچ گاڑیوں کو پھلانگ کر ایک نیا ریکارڈ قائم کیا ہے۔

ٹک ٹاک پر پوگوٹائلر کے نام سے مشہور ٹائلر فلپس امریکی ایکس پوگو ٹیم کے سرگرم رکن ہیں۔ انہوں نے لندن میں اپنے فن کا مظاہرہ کرتے ہوئے پانچ گاڑیوں کو پھلانگا ہے۔ اس سے قبل ان کے ساتھی ڈالٹن اسمتھ اسی کاوش میں اپنا ٹخنہ تڑوا بیٹھے تھے۔ 2019 میں ڈالٹن نے چار کاروں کو پھلانگا تھا۔ اس کے جواب میں ٹائلر نے لندن کی پانچ ٹیکسیوں کو عبور کیا ہے۔ اسطرح وہ کامیاب رہے اور گنیز بک آف ورلڈ ریکارڈ کا اعزاز اپنے نام کرچکے ہیں۔

Tyler Phillips went flying over five London Black Cabs to set a new record for most consecutive cars jumped over on a pogo stick!#GWRDay pic.twitter.com/XqA9tYrnbZ

— Guinness World Records (@GWR) November 17, 2021

اس کے لیے ٹائلر نے پوگو اسٹک کی لمبائی احتیاط سے منتخب کی اور جیت کا نقشہ ذہن میں جمایا۔ تاہم جب وہ ٹیکسیوں کے پاس میدان میں پہنچے تو تھوڑے مخمصے کے شکار تھے۔ لیکن یکے بعد دیگر پانچ کاروں کو پھلانگ لیا اور اس پر بہت مسرور ہوئے۔ گنیز بک آف ورلڈ ریکارڈ نے انہیں باضابطہ طور پر اعزازی سند بھی دیدی ہے۔

اب ٹائلر مزید حوصلے سے سرشار ہوکر پانچ سے زائد کاروں کو عبور کرنے کی منصوبہ بندی کررہے ہیں۔ وہ بہت جلد اس کی مزید تیاریاں شروع کریں گے۔