امریکی ہاسٹل میں طالبہ کو یرغمال بناکر جنسی زیادتی 19سالہ نوجوان گرفتار

امریکی پولیس نے گرل فرینڈ کیساتھ جنسی زیادتی کرنے والے 19 سالہ لڑکے کو حراست میں لے لیا، فوٹو: فائل

---

امریکا میں پولیس نے گرل فرینڈ کو جنسی زیادتی کا نشانہ بنانے اور جسمانی تشدد پر 19 سالہ نوجوان کیانو لیبنیٹ کو حراست میں لے لیا۔

امریکی نشریاتی ادارے کے مطابق سینٹ کیتھرین یونیورسٹی کے ہاسٹل میں رہنے والی طالبہ نے انتظامیہ کو خود پر ہونے والی جنسی زیادتی اور تشدد سے آگاہ کیا جس پر پولیس طلب کی گئی۔

طالبہ نے پولیس کو بتایا کہ اس کے دوست نے ہاسٹل کے کمرے میں اسے یرغمال بنایا ہوا تھا جس کے دوران کئی بار جنسی زیادتی اور جسمانی تشدد کا نشانہ بنایا۔ انکار پر پانی کے ٹب میں ڈبونے کی کوشش کی، گلا گھونٹا اور چاقو کے زور پر زیادتی کی۔

لڑکی نے بتایا کہ آج کسی طرح اس کے نرغے سے نکلنے میں کامیاب ہوگئی اور یونی ورسٹی کی انتظامیہ کو بتایا جس پر پولیس لڑکے کو گرفتار کرنے ہاسٹل پہنچی۔

لڑکے نے پولیس کو دیکھ کر گرل فرینڈ کو کئی فون کیے اور جب لڑکی نے فون نہ اُٹھایا تو اس نے ٹیکسٹ میسیج پر پوچھا کہ باہر پولیس کیوں کھڑی ہے۔

اس دوران پولیس اہلکار کھڑکی کے ذریعے کمرے میں داخل ہوئے اور 19 سالہ نوجوان کو حراست میں لے لیا۔

سینٹ کیتھرین یونیورسٹی نے اس معاملے پر تبصرہ کرنے اور طالبہ کی شناخت ظاہر کرنے سے معذرت کرتے ہوئے کہا کہ اس سے متاثرہ لڑکی کو دوبارہ صدمہ پہنچے گا۔