پریانکا چوپڑا اور نک جونس کیلئے 20 ملین ڈالر کے گھر میں رہنا ناممکن

پریانکا چوپڑا اور نک جونس نے لاس اینجلس میں 20 ملین ڈالر کا پرتعیش گھر خریدا تھا : فوٹو : فائل

---

عالمی شہرت یافتہ بھارتی اداکارہ پریانکا چوپڑا اور اُن کے شوہر نِک جونس نے 20 ملین ڈالر کا اپنا پُرتعیش گھر چھوڑ دیا۔

بھارتی میڈیا کے مطابق پریانکا چوپڑا اور نک جونس نے اپنی شادی کے چند ماہ بعد ستمبر 2019 میں لاس اینجلس میں 20 ملین ڈالر کا پرتعیش گھر خریدا تھا، ان کے اس عالی شان گھر میں 7 بیڈ رومز، 9 باتھ رومز، 1 شیف کا کچن، 1 انڈور باسکٹ بال کورٹ، ٹمپریچر کنٹرول وائن روم، 1 انٹرٹینمنٹ لاؤنج، 1 ہوم تھیٹر، 1 اندرونی بولنگ ایلی، 1 مکمل سروس جم، بلیئرڈ روم اور اسٹیم شاور کے ساتھ 1 سپا ہے۔

رپورٹ میں بتایا گیا کہ پریانکا چوپڑا اور نک جونس کے اس عالی شان گھر میں سال 2020 سے ہی 'غیر محفوظ واٹر پروفنگ' اور آلودگی کے مسائل پیدا ہونا شروع ہوگئے تھے جس کے بعد اس اسٹار جوڑی نے اس گھر کے سابق مالک کے خلاف مقدمہ درج کیا جبکہ قانونی کارروائی کے دوران عدالت نے اس پُرتعیش گھر کو ناقابل رہائش قرار دے دیا تھا۔

میڈیا رپورٹ میں بتایا گیا کہ پریانکا چوپڑا اور اُن کے شوہر نے یہ گھر خالی کردیا ہے، وہ اپنی بیٹی مالتی کے ہمراہ دوسرے گھر منتقل ہوگئے ہیں۔

رپورٹ میں یہ واضح نہیں کیا گیا کہ یہ جوڑی اپنے گھر میں واپس کب آئے گی جبکہ ابھی اُس گھر میں کوئی نہیں رہ رہا اور نہ اس گھر کو کرائے پر دیا گیا ہے۔

یاد رہے کہ پریانکا چوپڑا نے 2018 میں امریکی گلوکار نک جونس سے شادی کی تھی جس کے 4 سال بعد 2022 میں ان کے ہاں سروگیسی کے زریعے بیٹی کی پیدائش ہوئی۔