سری لنکن کرکٹ بورڈ کا فیصلہ سابق کرکٹرز نے خوش آئندہ قرار دیدیا

 لاہور: قومی کرکٹرز نے سری لنکن ٹیم کی پاکستان آمد کو خوش آئند قرار دیدیا۔

لاہور میں میڈیا سے بات کرتے ہوئے مصباح الحق نے کہا کہ زمبابوے کیخلاف ہوم سیریز، پی ایس ایل ٹو کے فائنل اور ورلڈ الیون کے دورہ سے اعتمادکی بحالی کا جو سفر شروع کیا تھا،اس کو جاری رکھنا بہت اہمیت کا حامل ہے، ٹی ٹوئنٹی میچ کیلیے آئی لینڈرزکی  لاہورآمد سے ملک میں بین الاقوامی کرکٹ کے دروازے کھلیں گے۔ انھوں نے کہا کہ پاکستان میں انٹرنیشنل ٹیموں کو بلوانے پر پی سی بی مبارکباد کا مستحق ہے، زمبابوے، پی ایس ایل فائنل اور ورلڈ الیون کے بعد اب سری لنکن ٹیم کو پاکستان کو خوش آمدید کہتا ہوں۔

سابق آل راؤنڈر عبدالرزاق نے کہا کہ آئی لینڈرز کی آمد پاکستان کرکٹ کیلیے نیک شگون ہے، یہ سلسلہ آگے بڑھتا رہنا چاہیے، تاہم ملک میں انٹرنیشنل کرکٹ کی بحالی تب ہو گی جب بھارتی ٹیم پاکستان آئے گی، پڑوسی ملک کے کرکٹرز نے دورہ کیا تو میدانوں کی رونقیں بحال کرنے کی مہم میں تیزی آئے گی۔ بلو شرٹس کے بعد دیگر ملکوں کی ٹیمیں بھی آنے کیلیے تیار ہوجائیں گی۔

علاوہ ازیں بلاول بھٹی نے کہا کہ سری لنکن ٹیم کی آمد ملک میں انٹرنیشنل کرکٹ بحالی کی طرف اہم قدم ہے، ورلڈ الیون کیخلاف سیریزکوشائقین کی بھرپور توجہ حاصل ہوئی، سری لنکا کیخلاف میچ میں بھی میدان بھرا ہوگا۔