31 مئی کو ملکی تاریخ کے اہم فیصلے ہونے جارہے ہیں، شیخ رشید

ویب ڈیسک  منگل 17 مئ 2022
فوٹو:فائل

فوٹو:فائل

 اسلام آباد: سابق وزیرداخلہ شیخ رشید نے حکومت کو آڑے ہاتھوں لیتے ہوئے کہا کہ 31 مئی کو ملکی تاریخ کے اہم فیصلے ہونے جارہے ہیں۔

شیخ رشید کی اسلام آباد ہائیکورٹ کے باہر میڈیا سے گفتگو کرتے ہوئے کہا کہ پنجاب میں کوئی حکومت نہیں، تحریک انصاف کے بغیر کابینہ نہیں بن سکتی۔ انہوں نے دعویٰ کیا کہ 31 مئی کو ملکی تاریخ کے اہم فیصلے ہونے جارہے ہیں۔

سابق وزیر داخلہ نے کہا کہ اداروں کو پاکستان کی ریڑھ کی ہڈی سمجھتا ہوں مگر یہ لوگ اداروں سے افسران کو نکال کر کرائے کے لوگ بھرتی کررہے ہیں، ایف آئی اے ایک کام میں لگا ہے کہ حمزہ شہباز، فریال تالپور، آصف علی زرداری کے کیسز کیسے ختم ہوں۔

انہوں نے حکومت کو تنقید کا نشانہ بناتے ہوئے کہا کہ آج ملک میں ڈالر 200 روپے ہونے جارہا ہے، جس کی نالائقی موجودہ نظام کے سر ہے۔ شیخ رشید نے کہا کہ انکی زیادہ تر اتحادی جماعتیں نئے انتخابات کی حامی ہیں۔

سابق وفاقی وزیر نے مسلم لیگ ن کے قائد نواز شریف پر طنز کرتے ہوئے کہا کہ آپ کی حکومت ہے، اب آپ کو پاکستان آنے سے کون روک رہا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔