بھارتی اپوزیشن لیڈر سونیا گاندھی ایک بار پھر کورونا میں مبتلا

نئی دہلی: بھارت کی بانی جماعت کانگریس کی صدر سونیا گاندھی کا کورونا ٹیسٹ مثبت آیا ہے جس پر انھوں نے خود کو قرنطینہ کرلیا۔

بھارتی میڈیا کے مطابق معمولی علامات ظاہر ہونے پر اپوزیشن لیڈر سونیا گاندھی کا کورونا ٹیسٹ کرایا گیا جو مثبت آگیا۔ سونیا گاندھی نے ٹیسٹ مثبت آنے پر کورونا احتیاطوں کے پیش نظر اپنی تمام مصروفیات ترک کرکے خود کو قرنطینہ کرلیا۔

کانگریس کے رکن اسمبلی اور کمیونیکیشن انچارج جے رام رمیش نے بتایا کہ سونیا گاندھی کی طبیعت خطرے سے باہر ہے تاہم وہ کورونا ٹیسٹ منفی آنے تک قرنطینہ میں رہیں گی اور ڈاکٹرز کی ٹیم ان کا معائنہ کرتی رہی گی۔

Congress President Smt. Sonia Gandhi has tested positive for Covid-19 today. We wish her speedy recovery and good health.

— Congress (@INCIndia) August 13, 2022

جے رام رمیش نے مائیکروبلاگنگ ویب سائٹ ٹوئٹر پر اپنے پیغام میں پارٹی کی جانب سے سونیا گاندھی کی جلد صحت یابی کے لیے دعا کی درخواست بھی کی۔

یاد رہے کہ سونیا گاندھی دو ماہ قبل بھی کورونا میں مبتلا ہونے پر دہلی کے سر گنگا رام اسپتال میں بھی داخل رہی تھیں جس کے دوران سونیا گاندھی نے منی لانڈرنگ کیس میں پوچھ گچھ کے لیے انفورسمنٹ ڈائریکٹوریٹ (ای ڈی) سے مزید وقت بھی مانگا تھا۔