گورنرپنجاب نے اعتماد کے ووٹ کا جو حکم دیا وہ غیر قانونی ہے، پرویز الہٰی

ویب ڈیسک  جمعرات 5 جنوری 2023
—فائل فوٹو

—فائل فوٹو

 لاہور: وزیراعلیٰ پنجاب پرویز الہیٰ نے کہا ہے کہ گورنرپنجاب نے اعتماد کے ووٹ کے بارے میں جو حکم دیا وہ غیر قانونی ہے اس لیے تسلیم نہیں کرتے۔ 

انسٹی ٹیوٹ آف کارڈیالوجی وزیرآباد میں میڈیا کے نمائندوں سے گفتگو کرتے ہوئے انہوں نے کہا کہ ہمیں گورنر کے غیر قانونی حکم پر عمل کرنے کی کوئی ضرورت نہیں جبکہ ہم نے پنجاب کے مختلف محکموں میں بھرتیوں سے پابندی اٹھا لی ہے۔

انہوں نے مسلم لیگ (ن) پر کڑی تنقید کرتے ہوئے کہا کہ پی ٹی آئی چیئرمین عمران خان جیسا لیڈر پاکستان میں پیدا نہیں ہو گا، قائد اعظم کے بعد عمران خان جیسا ایماندار لیڈر پہلی بار پاکستان کو ملا ہے۔

چوہدری پرویز الہیٰ  نے کہا کہ عمران خان کی قیادت میں پاکستان نے بڑی ترقی کرنی ہے، سارے نالائق ن لیگ والے پیچھے رہ جائیں گے، شہباز شریف مکمل طورپر ایکسپوز ہوگیا ہے۔

وزیراعلیٰ پنجاب نے کہا کہ ن لیگ والوں کو کسی چیز کی سمجھ نہیں، چند ماہ میں ایک لاکھ سے زائد نوکریاں دیں گے، ترکیہ کی کمپنی اوزپاک سے صفائی کا معاہدہ ہوگیا ہے اب آپ کو ہر شہر میں صفائی کی صورتحال میں بہتری نظر آئے گی۔

چوہدری پرویز الہیٰ نے کہا کہ اللہ کے فضل وکرم اورعوا م کی دعاؤں سے وزارت اعلیٰ ملی ہے، وزارت اعلیٰ کا منصب غریب عوام کے لیے وقف کیا ہے، ریب لوگوں کا معیار زندگی بلند کرنے کے لیےدن رات ایک کیا ہواہے۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔