مسلم لیگ (ق) نے انقلاب مارچ کیلئے کارکنان کو ایک ہفتہ کا سامان ساتھ لانے کی ہدایت کردی

کارکنان اپنے ہمراہ بستر، تکیے، چادریں اور کھانے پینے کی اشیا ساتھ لے کر آئیں، انقلاب کی کال دی جاسکتی ہے، پرویز الہیٰ

ویب ڈیسک پير 4 اگست 2014

یوم آزادی کا سورج غیرجمہوری اور ظالم حکمرانوں سے نجات کی نوید لے کر طلوع ہوگا، پرویز الہیٰ فوٹو؛فائل

لاہور: مسلم لیگ (ق) نے کارکنان کو انقلاب مارچ میں شرکت کرنے اور ایک ہفتہ کا راشن و دیگر ضروری سامان ساتھ لانے کی ہدایت کی ہے۔

ایکسپریس نیوز کے مطابق مسلم لیگ (ق) کا لاہور ڈیوس روڈ آفس میں اعلی سطح کا اجلاس منعقد ہوا جس میں ملک بھر سے ضلعی صدور اور سیکریٹریز نے شرکت کی۔ اس موقع پر خطاب کرتے ہوئے مرکزی رہنما چوہدری پرویز الہیٰ نے کارکنان کو ہدایت کی کہ وہ 10 اگست کو منہاج القرآن کے یوم شہدا میں بھرپور شرکت کریں اور اپنے ہمراہ 7 دن کا راشن لے کر آئیں۔ انہوں نے کہا کہ یوم شہدا کے روز انقلاب کا اعلان کیا جاسکتا ہے جس کے پیش نظر تمام کارکنان اپنے ہمراہ بستر، تکیے، چادریں اور کھانے پینے کی اشیا ساتھ لے کر آئیں۔

چوہدری پرویز الہیٰ کا کہنا تھا کہ انقلاب مارچ میں کسی قسم کی رکاوٹ برداشت نہیں کی جائے گی، حکمران بات جمہوریت کی کرتے ہیں لیکن ان کے رویئے غیر جمہوری ہیں، یوم آزادی کا سورج غیرجمہوری اور ظالم حکمرانوں سے نجات کی نوید لے کر طلوع ہوگا۔