پاکستان کسی بھی جارحیت کا منہ توڑجواب دینےکی صلاحیت رکھتا ہے، وزیر دفاع

کامرہ: وزیر دفاع خواجہ آصف کا کہنا ہے کہ پاکستان کسی بھی جارحیت کا منہ توڑجواب دینے کی صلاحیت رکھتا ہے۔

ایکسپریس نیوز کے مطابق کامرہ ائیربیس پرجدید جے ایف 17 تھنڈر طیارے پاک فضائیہ کے بیڑے میں شامل کرنے کی تقریب سے خطاب کرتے ہوئے وزیر دفاع خواجہ آصف کا کہنا تھا کہ پاکستان کسی بھی جارحیت کامنہ توڑجواب دینے کی صلاحیت رکھتا ہے، مشکل وقت میں پاک فضائیہ کا کرداراہم ہے، پاک فضائیہ بہادری اور جواں مردی کی علامت ہے، پاک فضائیہ نے ناصرف پاکستان بلکہ دنیا بھر میں اپنی غیر معمولی پیشہ وارانہ مہارت ثابت کی ہے، پاک فضائیہ کے اسکواڈرنزکو بتدریج جدید طیاروں سے لیس کیا جارہا ہے، جےایف تھنڈر17 کی شمولیت پاک فضائیہ کے لئے تاریخی ہے۔

اس خبرکو بھی پڑھیں: پاک فضائیہ کے بیڑے میں مزید جے ایف 17 تھنڈر طیارے شامل

تقریب میں شریک ائیر چیف مارشل سہیل امان نے  خطاب کےدوران کہا کہ طیاروں کی حوالگی سے پاک فضائیہ کے اعتماد میں اضافہ ہوگا،  جے ایف  17 تھنڈرکی صلاحیت کسی بھی فورتھ جنریشن طیارے سے کم نہیں، ہمیں پاک فضائیہ کے ہرجوان پرفخرہے اور پاک فضائیہ ملک کی جنوبی سرحدوں پر پوری طرح توجہ مرکوز کیے ہوئے ہے۔