بھارتی اداکار اوم پوری ساتھی اداکاروں کے ہمراہ لاہور پہنچ گئے

لاہور: برصغیر پاک وہند کے مقبول اداکاراوم پوری ساتھی اداکارہ دیویا دتہ اور گلوکار ہنس راج ہنس کے ہمراہ پاکستان پہنچ گئے۔

واہگہ باڈر سے لاہور پہنچنے پر ان کا استقبال برفی تھیٹر پروڈکشنز کے روح رواں بدر خان نے کیا جس کی تمام تیاریوں کو پہلے ہی حتمی شکل دیدی گئی تھی، واہگہ باڈر پر میڈیا سے بات کرتے ہوئے اوم پوری کا کہنا تھا کہ ان کی بہت خواہش تھی کہ پاکستان دیکھیں اور خاص طور پر لاہور جسے دیکھ کر پیدا ہوگیا ہوں۔ بھارت سے آنیوالے مہمانوں کو مقامی ہوٹل میں ٹہرایا جائے گا جب کہ دونوں فنکار کل لاہور کے الحمراء ہال میں اسٹیج ڈرامہ ’’تیری پریتم‘‘ پیش کریں گے۔ 3 روزہ اس خصوصی کھیل میں اوم پوری اور دیویادتہ اپنی اداکاری کے جوہر دکھائیں گے جب کہ تکنیکی سہولیات کے لیے ان کی ٹیم کے ارکان بھی وہاں موجود ہوں گے۔

واضح رہ کہ پہلی بار پاکستان یاترا کرنے کے خواہشمند اوم پوری یہاں آنے سے قبل ہی اس بات کا اظہار  کرچکے ہیں کہ وہ یہاں پراسٹیج ڈرامہ کرنے کے ساتھ ساتھ لاہور کی سیر بھی کریں گے اور یہاں کے لذیذ پکوان بھی کھائیں گے جس کے لیے ان کے میزبان، اداکار بدر خان نے تمام شیڈول ترتیب دے رکھا ہے جس کے مطابق وہ لاہور میں مصروف رہیں گے۔