پلیئر آف دی منتھ کی نامزدگیوں کا اعلان، پاکستانی کرکٹر بھی شامل

ویب ڈیسک  جمعرات 7 دسمبر 2023
فوٹو: آئی سی سی

فوٹو: آئی سی سی

 دبئی: انٹرنیشنل کرکٹ کونسل نے نومبر کیلئے پلیئر آف دی منتھ کی نامزدگیوں کا اعلان کردیا۔

آئی سی سی نے جمعرات کو مینز اور ویمنز پلیئر آف دی منتھ کیلئے تین، تین کھلاڑیوں کو نامزد کیا۔ دونوں کیٹیگریز میں سے ایک ایک کھلاڑی کو ووٹنگ کے بعد پلیئر آف دی منتھ قرار دیا جائے گا۔

خواتین کی کیٹیگری میں پاکستان کی اسپنر سعدیہ اقبال بھی شامل ہیں جبکہ بنگلہ دیش کی ناہیدہ اختر اور فرغانہ حق کو بھی شارٹ لسٹ کیا گیا ہے۔

28 سالہ سعدیہ اقبال نے گزشتہ ماہ گرین شرٹس کے بنگلادیش کے خلاف پہلے ون ڈے میں 13 رنز کے عوض چار وکٹیں لیکر اپنے کیریئر کا بہترین اسپیل کیا تھا۔

دوسرے ون ڈے میں انہوں نے 32 رنز دیکر دو وکٹیں حاصل کی تھیں۔ تیسرے ون ڈے میں اگرچہ وہ کوئی وکٹ حاصل نہیں کرسکی تھیں لیکن انہوں نے 10 اوورز میں صرف 30 رنز دیے تھے۔

بنگلادیش کی ناہیدہ اور فرغانہ کو پاکستان کے خلاف شاندار پرفارمنس پر پلیئر آف دی منتھ کیلئے نامزد کیا گیا ہے۔

آئی سی سی نے مینز پلیئر آف دی منتھ کیلئے آسٹریلیا کے ٹریوس ہیڈ اور گلین میکسویل اور بھارتی فاسٹ بولر محمد شامی کو نامزد کیا ہے۔

ٹریوس ہیڈ نے انڈیا کے خلاف ورلڈ کپ کے فائنل میں 137 رنز کی شاندار اننگز کھیل کر آسٹریلیا کو چھٹا ٹائٹل جتوانے میں اہم کردار ادا کیا تھا۔

گلین میکسویل نے افغانستان کیخلاف ورلڈ کپ کے میچ میں آسٹریلیا کو ناقابل یقین جیت دلائی تھی اور تنہا 202 رنز بناکر افغانستان کے منہ سے فتح چھین لی تھی۔

بھارتی فاسٹ بولر محمد شامی نے ورلڈ کپ میں صرف سات میچوں میں مجموعی طور پر 24 وکٹیں حاصل کی تھیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔