ورلڈکپ 2027 کے بعد ون ڈے کی مقدار کم، معیار بڑھانے کی تجویز

اسپورٹس رپورٹر  بدھ 12 جولائی 2023
عالمی کیلنڈر میں دیگر فارمیٹس کیلیے جگہ بنانے میں مدد ملے گی، ایم سی سی۔ فوٹو: آئی سی سی

عالمی کیلنڈر میں دیگر فارمیٹس کیلیے جگہ بنانے میں مدد ملے گی، ایم سی سی۔ فوٹو: آئی سی سی

 لاہور: ایم سی سی نے ورلڈکپ 2027کے بعد ون ڈے میچز کی مقدار کم، معیار زیادہ کرنے کی تجویز پیش کردی۔

لارڈز میں گزشتہ دنوں مائیک گیٹنگ کی زیرسربراہی کرکٹ کمیٹی کی میٹنگ میں ایک روزہ کرکٹ کے مجموعی معیار پر فکرمندی کا اظہار کیا گیا، شرکا نے کہا کہ اگلے ورلڈکپ کے بعد کم از کم ایک سال میچز کی تعداد میں نمایاں کمی کی تدبیر کرنا چاہیے، اس فیصلے سے ایک تو تعداد کم اور معیار زیادہ کرنے میں مدد ملے گی، دوسرے عالمی کرکٹ کیلنڈر میں ٹیسٹ سمیت دیگر فارمیٹس کیلیے جگہ بنانے میں مدد ملے گی۔

یہ بھی پڑھیں: ورلڈکپ؛ پاکستان کی شمولیت پر غیر یقینی کے سائے منڈلانے لگے

اجلاس میں بھارت، آسٹریلیا اور انگلینڈ کے سوا دیگر ملکوں میں ویمنز ٹیسٹ کرکٹ کے فروغ کی  پیش رفت سست ہونے کی نشاندہی کر دی گئی، ساتھ اس ضمن میں مسائل پر قابو پانے کیلیے خصوصی فنڈ بھی قائم کرنے کی تجویز دی گئی، ان تجاویز پر بدھ کو ڈربن میں آئی سی سی ایگزیکٹیو میٹنگ میں ابتدائی بات چیت متوقع ہے۔

یاد رہے کہ ایم سی سی کرکٹ کمیٹی میں پی سی بی کے سابق چیئرمین رمیز راجہ،سارو گنگولی، جسٹن لینگر، گریم اسمتھ، کمار سنگا کارا، جھولان گوسوامی اور ہیتھر نائٹ شامل ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔