اسکواڈ میں تیسرے اوپنر کے طور پر شامل ہوا ہوں عبداللہ شفیق
کھیلنے کا موقع دینے کا فیصلہ منیجمنٹ نے کرنا ہے، قومی کرکٹر
قومی کرکٹر عبداللہ شفیق کا کہنا ہے کہ اسکواڈ میں تیسرے اوپنر کے طور پر شامل ہوا ہوں، کھیلنے کا موقع دینے کا فیصلہ منیجمنٹ نے کرنا ہے۔
لاہور میں میڈیا سے گفتگو کرتے ہوئے انہوں نے کہا کہ صرف بھارت کیخلاف نہیں پورے ورلڈ کپ میں بہتر پرفارم کرنا ہے۔ میگا ایونٹ میں صرف بھارت سے کھیلنے نہیں جا رہے ہیں، سب حریفوں سے میچز میں عمدہ کارکردگی دکھانے کا عزم لیکر میدان میں اتریں گے۔
انہوں نے کہا کہ جب بھی موقع ملا اچھا پرفارم کرتے ہوئے ٹیم کی فتوحات میں اہم کردار ادا کرنے کی کوشش کروں گا۔ جہاں میری ضرورت ہوئی ٹیم پلان کے مطابق کھیل پیش کرنے کی کوشش کروں گا۔
عبداللہ شفیق نے کہا کہ سب کی نظریں ورلڈ کپ پر ہوتی ہیں، مجھ سمیت تمام کھلاڑی اپنی بہتری کارکردگی کا مظاہرہ کرنے کیلئے بیتاب ہیں۔