کامران، سلمان اور راؤ افتخار چیف سلیکٹر کے کنسلٹنٹ مقرر

محمد یوسف انجم  جمعـء 1 دسمبر 2023
تینوں کرکٹرز کا نیوزی لینڈ میں ہونے والی ٹی20 سیریز پہلا اسائنمنٹ ہوگی (فوٹو: ایکسپریس ویب)

تینوں کرکٹرز کا نیوزی لینڈ میں ہونے والی ٹی20 سیریز پہلا اسائنمنٹ ہوگی (فوٹو: ایکسپریس ویب)

پاکستان کرکٹ بورڈ (پی سی بی) نے سابق کرکٹرز کامران اکمل، راؤ افتخار انجم اور سلمان بٹ کو چیف سلیکٹر وہاب ریاض کا کنسلٹنٹ مقرر کردیا۔

ایکسپریس نیوز کے مطابق پاکستان کے تینوں سابق کرکٹرز فوری طور پر اپنی ذمہ داریوں کا آغاز کریں گے۔ 12 جنوری سے نیوزی لینڈ میں ہونے والی پانچ ٹی20 انٹرنیشنل میچز کی سیریز انکا پہلا اسائنمنٹ ہوگی۔

یہ تینوں اراکین سلیکشن ڈیوٹی نہ ہونے کے دنوں میں اسکلز کیمپ میں اضافی ذمہ داریاں بھی نبھائیں گے۔

مزید پڑھیں: پی سی بی کا یونس خان اور سعید اجمل کو اہم ذمہ داریاں دینے کا فیصلہ

کامران اکمل نے 53 ٹیسٹ 157 ون ڈے انٹرنیشنل اور58 ٹی20 انٹرنیشنل میچز میں پاکستان کی نمائندگی کی اور تینوں فارمیٹس میں مجموعی طور پر 6 ہزار 871 رنز بنائے ہیں اور وکٹوں کے پیچھے 453 کیچز/ اسٹمپڈ کیے ہیں۔ وہ 2009 کا ٹی ٹوئنٹی ورلڈ کپ جیتنے والی ٹیم کے رکن تھے۔

مزید پڑھیں: سابق اٹارنی جنرل پی سی بی کے چیف الیکشن کمیشن مقرر

راؤ افتخار انجم بھی 2009 کا ٹی20 کپ جیتنے والی ٹیم میں شامل تھے وہ ایک ٹیسٹ 62 ون ڈے اور2 ٹی ٹوئنٹی کھیل چکے ہیں اور78 انٹرنیشنل وکٹیں حاصل کرچکے ہیں۔

مزید پڑھیں: حفیظ مینجمنٹ میں بھی آل راؤنڈر، ٹیم ڈائریکٹر کے ساتھ کوچ کی نشست پر براجمان

سابق کپتان سلمان بٹ نے 33 ٹیسٹ 78ون ڈے انٹرنیشنل اور24 ٹی ٹوئنٹی انٹرنیشنل میں پاکستان کی نمائندگی کی ہے اور تینوں فارمیٹس میں 11 سنچریوں کی مدد سے 5ہزار 209 رنز اسکور کیے ہیں۔ وہ بھی کامران اکمل اور راؤ افتخار انجم کی طرح 2009 کے ٹی20 ورلڈ کپ کی فاتح ٹیم کا حصہ تھے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔