کراچی؛ ملزمان نے کار سوار سے 34 آئی فون سے بھرا کارٹن چھین لیا

اسٹاف رپورٹر  منگل 5 دسمبر 2023
متاثر افراد دکاندار ہیں اور صدر موبائل مارکیٹ سے 34 آئی فون ایک کارٹن میں رکھ کر جا رہے تھے

متاثر افراد دکاندار ہیں اور صدر موبائل مارکیٹ سے 34 آئی فون ایک کارٹن میں رکھ کر جا رہے تھے

  کراچی: ڈسٹرکٹ کورنگی کے علاقے ماڈل کالونی ملیر کالا بورڈ کے قریب نامعلوم موٹر سائیکل سوار ملزمان ایک کروڑ روپے سے زائد مالیت کے موبائل فون چھین کر فرار ہوگئے۔

ایس ایچ او ماڈل کالونی سلطان قریشی کے مطابق کار میں سوار 2 افراد ایک کارٹن میں آئی فون لیکر قائد آباد کی جانب جا رہے تھے کہ اس دوران موٹر سائیکل سوار 2 ملزمان نے انھیں سر راہ اسلحے کے زور پر یرغمال بنا کر ان سے موبائل فونز سے بھرا کارٹن چھین لیا اور موقع سے فرار ہوگئے۔

انھوں نے بتایا کہ دونوں افراد دکاندار ہیں اور وہ صدر موبائل مارکیٹ سے 34 آئی فون ایک کارٹن میں رکھ کر جا رہے تھے جن کی مالیت ایک کروڑ 15 لاکھ کے قریب بتائی جاتی ہے۔

انھوں نے اس شبے کا اظہار کیا ہے کہ ملزمان نے متاثرہ افراد کا صدر سے ہی تعاقب کیا تھا تاہم پولیس اس حوالے سے مزید تحقیقات کر رہی ہے ۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔