ورلڈکپ؛ پاکستان نے ممبئی میں میچ کھیلنے سے انکار کردیا

ویب ڈیسک  منگل 27 جون 2023
سیکیورٹی خدشات کے حوالے سے بورڈ نے آئی سی سی حکام کو آگاہ کردیا (فوٹو: فائل)

سیکیورٹی خدشات کے حوالے سے بورڈ نے آئی سی سی حکام کو آگاہ کردیا (فوٹو: فائل)

بھارت میں شیڈول آئی سی سی ورلڈکپ 2023 کیلئے پاکستان نے سیکیورٹی خدشات کے باعث ممبئی میں اپنا میچ کھیلنے سے انکار کردیا جبکہ انٹرنیشنل کرکٹ کونسل حکام کو بھی اپنے تحفظات سے آگاہ کردیا۔

میڈیا رپورٹس کے مطابق آئی سی سی ورلڈکپ 2023 کے شیڈول کا اعلان آج منگل کو متوقع ہے تاہم سیمی فائنل کیلئے بھارتی ٹیم کوالیفائی کرتی ہے تو وہ ممبئی میں اپنا ناک آؤٹ میچ کھیلے گا جبکہ پاکستان اور بھارت کے درمیان سیمی فائنل میچ کی صورت میں کولکتہ کے ایڈن گارڈنز میں ہونے کا امکان ہے۔

رپورٹس میں کہا گیا ہے کہ ورلڈکپ فائنلز کیلئے ممبئی اور کولکتہ کو حتمی پلان کے طور پر شامل کیا گیا ہے۔

مزید پڑھیں: آئی سی سی ورلڈکپ 2023 کی ٹرافی خلا میں پہنچ گئی

سال 1991 میں ہندو انتہا پسند تنظیم کے رہنما بال ٹھاکرے کی شیو سینا پارٹی نے ممبئی کے وانکھیڈے اسٹیڈیم کی پچ پر توڑ پھوڑ کی تھی، جس سے دو دن قبل پاکستان نے ہندوستان میں ایک روزہ سیریز کھیلنی تھی تاہم پاکستان وہ دورہ منسوخ کردیا تھا۔

ماضی میں مذکورہ پارٹی کے تقریباً 25 حامیوں نے نئی دہلی کے فیروز شاہ کوٹلہ اسٹیڈیم پر دھاوا بولتے ہوئے پچ کھودی تھی، اس پچ پر دونوں ٹیموں کو ٹیسٹ سیریز کھیلنا تھی۔

مزید پڑھیں: ورلڈکپ شیڈول؛ انتظار کی گھڑیاں ختم ہونے لگیں

پاکستان نے اس سے قبل بھی سیکیورٹی وجوہات کی بنا پر احمد آباد میں کھیلنے پر خدشات کا اظہار کیا تھا تاہم بھارتی کرکٹ بورڈ اور پاکستان کرکٹ بورڈ کے درمیان وسیع بات چیت اور مذاکرات کے بعد معاملات حل ہوگئے تھے۔ یہ فیصلہ پی سی بی کے مجوزہ ہائبرڈ ماڈل کو قبول کرنے کے بعد سامنے آیا تھا۔ اب 15 اکتوبر کو احمد آباد کے نریندر مودی اسٹیڈیم میں روایتی حریفوں کا ایک دوسرے سے مقابلہ ہونے کے قوی امکانات ہیں۔

مزید پڑھیں: ورلڈکپ؛ قومی ٹیم شرکت کرے گی یا نہیں! اعلان جلد کریں گے

ابتدائی طور پر ڈرافٹ شیڈول میں دو سیمی فائنل بنگلورو اور چنئی کے لیے مختص کیے گئے تھے تاہم پیر کو ممبئی میں بھارتی کرکٹ بورڈ کے اعلیٰ حکام اور ایسوسی ایشنز کے نمائندوں کے درمیان ہونے والی میٹنگ کے نتیجے میں مقام تبدیل کرنے کا فیصلہ کیا گیا۔

دوسری جانب پاکستان کرکٹ بورڈ نے افغانستان اور آسٹریلیا کے خلاف اپنے میچوں کے لیے مقامات کی تبدیلی کی کوشش کی درخواست کی تھی کہ آسٹریلیا کے خلاف ان کا میچ چنئی اور افغانستان کے خلاف ان کا میچ بنگلورو میں منتقل کیا جائے تاہم بی سی سی آئی اور آئی سی سی نے درخواستوں کو مسترد کردیا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔