بحیثیت مسلمان میرا یقین ہے فتح فلسطین کی ہوگی، ثنا خان

ویب ڈیسک  ہفتہ 21 اکتوبر 2023
ثنا خان کی فلسطین کے لیے دُعا: فوٹو ویب ڈیسک

ثنا خان کی فلسطین کے لیے دُعا: فوٹو ویب ڈیسک

 ممبئی: مذہب کی خاطر بالی ووڈ کو خیرباد کہنے والی سابقہ بھارتی اداکارہ ثنا خان نے کہا ہے کہ ایک مسلمان ہونے کی حیثیت سے میرا یقین ہے فتح فلسطین کی ہوگی۔

ثنا خان نے اپنے آفیشل انسٹاگرام ہینڈل پر اپنی ویڈیو پوسٹ کی جس میں وہ روتے ہوئے اسرائیل کے ہاتھوں دہشت گردی کا شکار ہونے والے معصوم فلسطینیوں کے لیے دُعا کررہی ہیں۔

اُنہوں نے اپنی ویڈیو پوسٹ کرتے ہوئے کہا کہ ‘کوئی ساتھ دے یا نہ دیں لیکن اللہ فلسطین کے ساتھ ہے، میں بہت بےبس ہوں لیکن ان حالات میں ہم صرف دُعا ہی کرسکتے ہیں’۔

ثنا خان نے کہا کہ ‘معصوم لوگ اور معصوم بچوں کا قتل کیا جارہا ہے، اقتدار میں رہنے والوں فلسطین میں ہونے والی نسل کشی کو روکنے کے لیے کچھ کرلو’۔

مزید پڑھیں: ثنا خان تنقید کے بعد بالآخر فلسطین کے حق میں بول پڑیں

اُنہوں نے یہ بھی کہا کہ ‘وہ اُن کی زمینوں پر قبضہ کرکے اور معصوم لوگوں کا روازنہ کی بنیاد پر قتل کرکے خود کو مظلوم دِکھا رہے ہیں’۔

ثنا خان نے مزید کہا کہ ‘مجھے یقین ہے کہ فلسطین کی فتح ہوگی، میں آج، کل اور ہمیشہ اپنے فلسطینی بہن بھائیوں کے ساتھ کھڑی ہوں اور پوری اُمت مسلمہ کے ساتھ کھڑی ہوں’۔

واضح رہے کہ اس سے قبل ثنا خان کو اسرائیل فلسطین کشیدگی پر خاموش رہنے کی وجہ سے سوشل میڈیا صارفین کی جانب سے شدید تنقید کا نشانہ بنایا گیا تھا اور ساتھ ہی کئی مداحوں نے تو ثنا خان کو سوشل میڈیا سے اَن فالو بھی کردیا تھا۔

مزید پڑھیں: غزہ میں اپنی بیٹی کی حفاظت کیسے کرتی؟ بھارتی اداکارہ کا سوال

صارفین کا کہنا تھا کہ ثنا خان کو بھارت کا خوف ہے، وہ بزدل ہیں اور اُنہیں ڈر ہے کہ اگر فلسطین کے حق میں کچھ بولا تو اُن کا یوٹیوب چینل بند ہوجائے گا۔

سوشل میڈیا پر شدید تنقید کا شکار ہونے کے بعد ثنا خان نے اپنے آفیشل انسٹاگرام ہینڈل کی اسٹوری میں ایک معصوم فلسطینی بچے کی ویڈیو شیئر کی جو اسرائیلی فوج کی بمباری کی وجہ سے شدد خوف میں مبتلا کانپ رہا تھا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔