ورلڈکپ فائنل کیوں ہارے؛ بھارتی کپتان، ہیڈکوچ نے ’’پچ‘‘ پر ملبہ ڈال دیا

ویب ڈیسک  اتوار 3 دسمبر 2023
پچ تبدیلی کے باوجود بھارت کو ایونٹ کے فائنل میں آسٹریلیا سے شکست ہوئی تھی (فوٹو: ایکسپریس ویب)

پچ تبدیلی کے باوجود بھارت کو ایونٹ کے فائنل میں آسٹریلیا سے شکست ہوئی تھی (فوٹو: ایکسپریس ویب)

بھارتی ٹیم کے کپتان روہت شرما اور ہیڈکوچ راہول ڈریوڈ آسٹریلیا کے ہاتھوں آئی سی سی ورلڈکپ فائنل میں شکست نہ بھول سکے۔

میڈیا رپورٹس کے مطابق بھارتی کرکٹ بورڈ (بی سی سی آئی) کے اعلیٰ عہدیداران نے دہلی میں ہیڈکوچ راہول ڈریوڈ اور کپتان روہت شرما کیساتھ ویڈیو کال میٹنگ کی جس میں آئی سی سی ورلڈکپ فائنل میں شکست کی وجہ پوچھی گئی۔

اس میٹنگ میں بورڈ کے سکریٹری جے شاہ، نائب صدر راجیو شکلا اور خزانچی آشیش شیلر موجود تھے۔

مزید پڑھیں: بھارت کی جانب سے ’پچ تبدیلی‘ تنازع میں آئی سی سی کمزور قرار

کوچ راہول ڈریوڈ نے ورلڈکپ فائنل میں شکست کا ملبہ احمد آباد اسٹیڈیم کی پچ پر ڈال دیا جبکہ کپتان روہت شرما نے پچ کو اسپنرز کیلئے سازگار نہ ہونے کا شکوہ کیا۔بھارتی کپتان نے کہا کہ مبینہ طور پر پچ اتنی نہیں بدلی جتنا ٹیم مینجمنٹ نے سوچا تھا۔

مزید پڑھیں: ورلڈکپ فائنل سے قبل تنازع؛ کمنز نے پچ پر اعتراضات اٹھادیئے

واضح رہے کہ آئی سی سی ایونٹس کے دوران ناک آؤٹ مرحلے کیلئے نئی پچز بنائی جاتی ہیں تاہم بھارت نے اپنی ٹیم کو میگا ایونٹ جتوانے کیلئے پرانی پچز پر میچ کروائے اور اسپنرز کیلئے سازگار پچز بنوائیں جس نے مخالف ٹیم کے خلاف کامیابی تناسب بڑھا دیا۔

مزید پڑھیں: آسٹریلیا ناقابل شکست بھارت کو ہرا کر چھٹی بارکرکٹ کا عالمی چیمپئن بن گیا

میچ سے قبل آسٹریلوی کپتان پیٹ کمنز نے احمد آباد کے نریندر مودی اسٹیڈیم کی پچ پر سوال اٹھائے تھے جبکہ گراؤنڈ اسٹاف کے ساتھ انکی بحث بھی ہوئی تھی۔

ایک لاکھ 30 ہزار سے زائد تماشائیوں کی گنجائش رکھنے والے اسٹیڈیم میں بھارت کو ہوم گراؤنڈ کے سامنے آسٹریلیا کے ہاتھوں عبرتناک شکست ہوئی تھی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔