میں اور عمران خان کے کزن انٹرا پارٹی الیکشن لڑنا چاہتے مگر موقع نہیں دیا گیا، اکبر ایس بابر

ویب ڈیسک  پير 4 دسمبر 2023
فوٹو فائل

فوٹو فائل

 اسلام آباد: پی ٹی آئی کے بانی رکن اکبر ایس بابر نے کہا ہے کہ پی ٹی آئی نے انٹرا پارٹی الیکشن کے نام پر ڈرامہ کیا، انتخاب کو سائیڈ پر رکھ کر انٹراپارٹی الیکشن کمیشن بنایا جائے۔

سابق چیئرمین پی ٹی آئی عمران خان کے لیے جاری کیے گئے اپنے وڈیو بیان جاری کردیا جس میں انہوں نے کہا کہ پاکستان تحریک انصاف اور بلے کا نشان داؤ پر لگا ہوا ہے، تنظیم کو شدید مسائل کا سامنا ہے، پی ٹی آئی نے انٹرا پارٹی الیکشن کے نام پر ڈرامہ کیا،  انتخاب کو سائیڈ پر رکھ کر انٹراپارٹی الیکشن کمیشن بنایا جائے۔

انہوں نے کہا کہ ووٹر لسٹ پارٹی آئین کے مطابق فراہم کی جائے، بانی اراکین اور پارٹی کے دیگر رہنماؤں اور کارکنان کو ان کے بنیادی آئینی اور جمہوری حق ووٹ سے محروم کر دیا گیا، پاکستان تحریک انصاف کو پارٹی آئین کے مطابق چلایا جائے۔

انہوں ںے کہا کہ مرکزی سیکرٹریٹ کے دورے پر نہ کاغذات نامزدگی فراہم کیے گئے اور نہ ہی ووٹرز کی لسٹ دی گئی، فہرستیں اور پارٹی انتخابات میں حصہ لینے کا طریقہ کار بھی نہیں بتایا گیا۔

انہوں ںے مزید کہا کہ بوگس انٹرا پارٹی الیکشن نے پارٹی کے لیے مشکلات بڑھا دی ہیں، میرے اور دیگر بانی ممبران سمیت عمران خان کے کزن سعید اللہ نیازی انٹرا پارٹی الیکشن لڑنا چاہتے تھے لیکن انہیں موقع نہیں دیا گیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔