پاکستان اور ایران خطے میں کشیدگی کے خواہشمندوں کے ہاتھوں کھلونا نہ بنیں؛ روس

ویب ڈیسک  جمعرات 18 جنوری 2024
پاکستان اور ایران سے معاملات سفارتی طور پر حل کرنے کی اپیل کرتے ہیں، روس

پاکستان اور ایران سے معاملات سفارتی طور پر حل کرنے کی اپیل کرتے ہیں، روس

 ماسکو: روس نے ایران اور پاکستان سے اپیل کی ہے کہ زیادہ سے زیادہ تحمل کا مظاہرہ کرتے ہوئے اختلافات کو سفارت کاری کے ذریعے حل کریں۔

عالمی خبر رساں ادارے کے مطابق روس کی وزارت خارجہ کی ترجمان ماریا زاخارووا نے امریکا کا نام لیے بغیر کہا کہ پاکستان اور ایران کشیدگی کو طول دیکر ان لوگوں کے ہاتھوں میں کھلونا نہ بنیں جو خطے میں امن نہیں چاہتے۔

ترجمان ماریا زاخارووا نے کہا کہ دونوں ممالک کے درمیان کشیدگی، خطے کے امن و استحکام اور سلامتی میں دلچسپی نہ رکھنے والوں کے لیے سود مند ہوگی۔

یہ خبر پڑھیں : پاکستان کا ایران میں جوابی آپریشن ، متعدد دہشتگرد ہلاک

روسی وزارت خارجہ کی ترجمان نے اپنے بیان میں مزید کہا کہ پاکستان اور ایران شنگھائی تعاون تنظیم (SCO) کا حصہ ہیں۔ یہ افسوسناک ہے کہ یہ دوست ایس سی او ممالک کے درمیان ہو رہا ہے جن کے ساتھ ہم شراکت داری کے تعلقات کو فروغ دے رہے ہیں۔

روس کی ترجمان نے ایران اور پاکستان پر زور دیا کہ  ذمہ دار ممالک ہونے کا ثبوت دیتے ہوئے تحمل کا مظاہرہ کریں اور اپنے اختلافات کو سفارت کاری کے ذریعے حل کریں۔

یہ خبر بھی پڑھیں : پاکستانی حدود میں بلا اشتعال کارروائی،ایرانی ناظم الاموردفترخارجہ طلب

ترجمان زاخارووا نے کہا کہ کسی دوسرے ملک کی خود مختار سرزمین پر دہشت گردی کے خلاف کوئی بھی کارروائی اس ملک کے حکام کے ساتھ معاہدے اور ہم آہنگی کے ساتھ کی جانی چاہیے۔

یہ بھی پڑھیں : امریکا کی پاکستان پر ایران کی جانب سے حملے کی مذمت

واضح رہے کہ ایران نے بلوچستان میں میزائل حملہ کیا تھا جس میں 2 بچے شہید اور 5 بچیاں زخمی ہوگئی تھیں جس کے جواب پاکستان نے ایران میں دہشت گردوں کے ٹھکانوں کو نشانہ بنایا۔

 

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔