چین اور ایران کی شہباز شریف کو وزیراعظم منتخب ہونے پر مبارکباد

ویب ڈیسک  اتوار 3 مارچ 2024
شہباز شریف 102 ووٹ سے پاکستان کے 24 ویں وزیراعظم بن گئے، فوٹو: فائل

شہباز شریف 102 ووٹ سے پاکستان کے 24 ویں وزیراعظم بن گئے، فوٹو: فائل

تہران: چین کے صدر شی جن پنگ، وزیر اعظم لی کیانگ اور ایران سمیت دیگر ممالک نے شہباز شریف کو پاکستان کا وزیر اعظم منتخب ہونے پر مبارکباد دی۔

عالمی خبر رساں ادارے کے مطابق چین صدر شی جنپنگ نے اس اعتماد کا اظہار کیا کہ وزیراعظم شہباز شریف اور نئی حکومت کی قیادت میں بھی چین اور پاکستان قومی ترقی اور پیشرفت کے مقصد میں نئی اور عظیم تر کامیابیاں حاصل کر سکیں گے۔

چینی صدر شی جنپنگ نے اس بات پر بھی زور دیا کہ چین پاکستان کو اپنی روایتی دوستی کو جاری رکھتے ہوئے مختلف شعبوں میں تبادلوں اور تعاون کو مضبوط کرنا چاہیے اور چین پاکستان اقتصادی راہداری کا مشترکہ طور پر اپ گریڈ ورژن بنانا چاہیے۔

اسی طرح ایران کے وزیرِ خارجہ حیسن امیر عبداللہیان نے شہباز شریف کو پاکستان کا وزیراعظم منتخب ہونے پر مبارک باد پیش کرتے ہوئے باہمی تعلقات میں اضافے کے عزم کا اظہار کیا۔

یہ خبر پڑھیں : شہباز شریف پاکستان کے 24 ویں وزیراعظم منتخب 

ایرانی میڈیا کے مطابق وزیرِ خارجہ حسین امیر عبداللہیان نے اپنے بیان میں کہا کہ شہباز شریف کو 24 واں وزیرِاعظم منتخب ہونے پر مبارکباد پیش کرتا ہوں اور پاکستان میں امن و سلامتی کے لیے دعا گو ہوں۔

ایرانی وزیر خارجہ امیر عبداللہیان نے مزید کہا کہ اسلامی جمہوری ایران پاکستان کی نئی حکومت کے ساتھ تمام سطح پر باہمی تعلقات اور تعاون بڑھانے کا عزم کرتا ہے۔

خیال رہے کہ آج پاکستان کی نئی منتخب اسمبلی میں وزیراعظم کا انتخاب ہوگیا۔ 102 ارکان نے شہباز شریف کے حق میں ووٹ دیا جب کہ سنی اتحاد کونسل کے عمر ایوب کو 92 ووٹ ملے۔

 

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔