سعودی عرب کے شہر دمام میں مسجد کے قریب خود کش حملہ، 4 افراد جاں بحق

ریاض: سعودی عرب کے شہر دمام میں نماز جمعہ کی ادائیگی کے دوران مسجد کے قریب خود کش حملے میں 4 افراد جاں بحق اور متعدد زخمی ہوگئے۔ 

غیرملکی خبررساں ادارے کے مطابق سعودی عرب کے مشرقی شہر دمام میں نماز جمعہ کے لئے خطبہ دیا جارہا تھا کہ اس دوران مسجد کے دروازے کے قریب خود کش حملہ آور نے خود کو دھماکے سے اڑا لیا جس کے نتیجے میں 4 افراد جاں بحق اور متعدد زخمی ہوگئے۔ دھماکے کے فوری بعد پولیس اور دیگر سیکیورٹی فورسز سمیت امدادی ٹیموں کی بڑی تعداد موقع پر پہنچ گئی اور علاقے کو گھیرے میں لیتے ہوئے زخمیوں کو قریبی اسپتال منتقل کردیا۔

سعودی وزارت داخلہ کا کہنا ہے کہ حملہ آور نے برقعہ پہن رکھا تھا جسے سیکیورٹی اہلکاروں نے روکنے کی کوشش کی تاہم اس نے مسجد کے دروازے کے قریب خود کو دھماکے سے اڑالیا جب کہ خدشہ ہے کہ حملہ آور مسجد میں داخل ہونا چاہتا تھا۔

دوسری جانب پاكستان نے سعودی عرب كے شہر دمام ميں مسجد پر كيے جائے جانے خودكش حملے كی شديد مذمت كی ہے۔ دفتر خارجہ كے ترجمان نے كہا كہ ہم اس حملے اور اس ميں  بے گناہ شہريوں  كے جاں بحق ہونے كی شديد مذمت كرتے ہيں ان كے لواحقين كے ساتھ افسوس اور ہمدردی كا اظہار كرتے ہيں ۔ترجمان کا کہنا تھا کہ ہم برادر اسلامی ملک سعودی عرب كے غم ميں  برابر كے شريک ہيں اور پاكستان دہشت گردی کی مذمت كرتا ہے۔

واضح رہے کہ گزشتہ جمعہ بھی سعودی عرب کے مشرقی صوبے قطیف میں نماز جمعہ کی ادائیگی کے دوران مسجد میں خودکش حملہ ہوا تھا جس کے نتیجے میں 21 افراد جاں بحق اور 100 سے زائد زخمی ہوگئے تھے۔