ون ڈے میں 209 رنز عابد علی نے قومی ریکارڈ پاش پاش کر دیا

اسلام آبادکے اوپنر سب سے بڑی لسٹ اے اننگز کھیلنے میں کامیاب ، ڈبل سنچری بنانے والے چوتھے پاکستانی؛ فوٹوفائل

---

اسلام آباد کی نمائندگی کرنے والے عابد علی نے قومی ریکارڈ پاش پاش کر دیا وہ ون ڈے کرکٹ میں سب سے بڑی انفرادی اننگز کھیلنے والے پاکستانی بیٹسمین بن گئے۔

ڈومیسٹک ریجنل کپ میچ میں اسلام آباد کے اوپنر209 پرناقابل شکست رہے، انھوں نے لسٹ اے مقابلوں کے ٹاپ اسکورر کی فہرست میں11ویں نمبر پر اپنا نام درج کرالیا،عابد علی کو محمد علی،خالد لطیف اور کامران اکمل کے بعد 24رکنی ڈبل سنچری میکرز کلب میں جگہ بنانے والے چوتھے پاکستانی کا اعزاز بھی مل گیا۔

تفصیلات کے مطابق قومی ریجنل ون ڈے کپ میں اسلام آباد کی نمائندگی کرنے والے عابد علی نے پشاور کے بولرز کی درگت بناتے ہوئے ناقابل شکست 209رنز کی اننگز کھیلی، انھوں نے اس دوران 24چوکے اور 5 چھکے لگائے، یہ لسٹ اے میں کسی بھی سطح پر پاکستان کی جانب سے سب سے بڑی اننگز ہے،اس سے قبل 2005میں سیالکوٹ میں کھیلے جانے والے میچ میں پاکستان کسٹمز کے محمد علی نے ڈیفنس ہاؤسنگ اتھارٹی کیخلاف 207رنز بنائے تھے،ان کے ساتھ 2 ڈبل سنچری میکرز میں ایک نام خالد لطیف کا بھی ہے۔

پی ایس ایل اسپاٹ فکسنگ اسکینڈل میں 5 سالہ پابندی کا شکار ہونے والے اوپنر نے2009میں کراچی ڈولفنز کی جانب سے کراچی میں ناقابل شکست 204کی اننگز کھیلی تھی،کامران اکمل نے رواں سال جنوری میں ہی واپڈا کی نمائندگی کرتے ہوئے حیدرآباد میں حبیب بینک کیخلاف 200رنز بنائے تھے،یوں عابد علی نے نہ صرف چوتھی ڈبل سنچری بلکہ سب سے بڑا انفرادی ٹوٹل بھی بنایا۔

یاد رہے کہ لسٹ اے کرکٹ کی سب سے بڑی انفرادی اننگز کھیلنے کا اعزاز سرے کاؤنٹی کے اے ڈی براؤن کو حاصل ہے،انھوں نے 2002میں گلیمورگن کیخلاف میچ میں 268 رنز جڑ دیے تھے،ٹیم نے اس میراتھن اننگز کی بدولت 5وکٹ پر 438کا مجموعہ حاصل کا، حیرت کی بات ہے کہ جواب میں گلیمورگن نے بھی429رنز بنا دیے،اس ٹوٹل میں 2 بیٹسمینوں کی سنچریاں شامل تھیں، ون ڈے انٹرنیشنل کرکٹ میں سب سے بڑی انفرادی اننگز کھیلنے کا اعزاز بھارتی بیٹسمین روہت شرما کو حاصل ہے،اوپنر نے 2014میں کولکتہ میں سری لنکا کیخلاف 264رنز بنائے تھے۔

روہت شرما ایک روزہ میچز میں 3 ڈبل سنچریاں بنانے والے دنیا کے واحد بیٹسمین بھی ہیں، انھوں نے 2013میں آسٹریلیا کیخلاف بنگلور میں کھیلے جانے والے میچ میں 209 رنز بنائے، پھر 2017میں سری لنکا کیخلاف موہالی میں ناقابل شکست 208رنز بنا دیے، ون ڈے انٹرنیشنل کے دیگر ڈبل سنچری میکرز میں شیکھر دھون(248)،مارٹن گپٹل (237)، وریندر سہواگ (219) اورکرس گیل (215) شامل ہیں۔ پاکستان کی طرف سے ون ڈے انٹرنیشنل میں سب سے بڑا اسکور 194سعید انور نے بھارت کیخلاف 1997میں چنئی میں بنایا تھا ،مجموعی طور پر لسٹ اے کرکٹ میں عابد علی نے 11ویں بڑی انفرادی اننگز کھیلی اور ڈبل سنچری میکرز کلب کے 24ویں رکن بنے ہیں۔