پاکستان امریکا کا خطے میں امن کیلیے مثبت تعاون پر اتفاق

آرمی چیف سے قائم مقام امریکی نائب وزیر خارجہ کی ملاقات، سیکیورٹی صورتحال پر گفتگو

Numainda Express April 03, 2018

آرمی چیف سے قائم مقام امریکی نائب وزیر خارجہ کی ملاقات، سیکیورٹی صورتحال پر گفتگو۔ فوٹو: اے پی پی

آرمی چیف جنرل قمر جاوید باجوہ سے قائم مقام امریکی نائب وزیرخارجہ ایلس ویلز نے جی ایچ کیو میں ملاقات کی جس میں باہمی دلچسپی کے امور اور خطے کی سکیورٹی صورتحال پر تبادلہ خیال کیا گیا۔

آئی ایس پی آر کے مطابق آرمی چیف نے کہا پاکستان خطے اور بالخصوص افغانستان میں امن واستحکام کے لئے پرعزم اور کوشاں ہے پاکستان توقع کرتاہے خطے کے دوسرے ممالک بھی برابر کا مثبت کردار ادا کریں۔

قائم مقام امریکی نائب وزیرخارجہ ایلس ویلز نے کہا کہ امریکہ پائیدار امن کاعزم کئے ہوئے ہے اور خطے میں قیام امن کے لئے تمام کوششوں کی حمایت کرتا ہے۔

آئی ایس پی آر کے مطابق ملاقات میں دونوں ملکوں نے اتفاق کیا کہ الزامات تراشیوں کے بجائے خطے میں امن کیلئے مثبت تعاون جاری رکھا جائے گا۔ دونوں اطراف نے اس بات پر اتفاق کیا کہ مفروضوں میں گھرے رہنے کے بجائے مثبت مقاصد کے حصول کیلئے دوطرفہ روابط سے استفادہ کرنا چاہئے۔