کاٹن جننگ سیکٹر میں 1 ارب روپے کی سرمایہ کاری متوقع

آئندہ سیزن تک سندھ میں14نئی فیکٹریاں قائم کی جائیں گی،7کروڑفی کس لاگت آئے گی

Business Reporter April 22, 2018

پھٹی کی خریداری میں مقابلہ بڑھے گا، نسیم عثمان، حکومت نہ بننے دے، کاٹن جنرزمخالف۔ فوٹو: اے پی پی/فائل

LOS ANGELES,: سندھ میں تقریباً 1ارب روپے کی سرمایہ کاری سے 14 نئی جننگ صنعتوں کا قیام عمل میں لایا جا رہا ہے جب کہ مجوزہ جننگ فیکٹریاں کپاس کی سال 2018-19 کے سیزن میں قائم کی جائیں گی۔

کراچی کاٹن بروکرز فورم کے چیئرمین نسیم عثمان نے بتایاکہ ضلع خیرپور میں سوئی کے مقام پر 2 جننگ فیکٹریاں، ضلع بے نظیر آباد میں 6 فیکٹریاں، ضلع سانگھڑ کے شہر ٹنڈو آدم میں 5 جننگ فیکٹریاں جبکہ ضلع حیدرآباد میں 1فیکٹری بنائی جائے گی جبکہ یہاں دوسرے یونٹ کو توسیع دی جارہی ہے۔

نسیم عثمان نے بتایا کہ پہلے ہی300 جننگ فیکٹریوں میں پھٹی کی خریداری کے حوالے سے مسابقت کا رحجان شدید ہے، نئی فیکٹریوں کے قیام سے پھٹی کی خریداری میں مقابلہ مزید بڑھ جائے گا۔ سندھ کے جنرز کا کہنا ہے کہ سندھ حکومت اس وقت تک نئی فیکٹریوں کی تعمیر کی اجازت نہ دے جب تک کپاس کی فصل میں خاطر خواہ اضافہ نہ ہو۔