مارشل آرٹ کے ماہر راشد نسیم نے بھارت سے ایک اور ورلڈ ریکارڈ چھین لیا

راشد نسیم نے مستقبل میں پاکستان کے لیے 50 عالمی ریکارڈ قائم کرنے کا عزم ظاہر کیا ہے (فوٹو: نیوز ایجنسی)

---

مارشل آرٹ کے عالمی شہرت یافتہ کھلاڑی راشد نسیم نے 26 واں ورلڈ ریکارڈ بنادیا۔

راشد نسیم نے ایک منٹ میں ہتھیلی سے 278 اخروٹ توڑے اور اتنے ہی وقت میں 51 تربوز سر سے ٹکر مار کر پھوڑ دیے، گینز آف ریکارڈ میں پاکستان کی جانب سے ریکارڈ قائم کرنے کا اعزازرکھنے والے راشد نسیم نے ایک اورکارنامہ انجام دے کر اپنی اہلیت ثابت کی، انھوں نے مزید 2 ورلڈ ریکارڈ بناکراپنا نام 26 ویں بارگنیز بک آف ورلڈ ریکارڈز میں لکھوالیا۔



پہلے ریکارڈ میں راشد نسیم نے ایک منٹ میں ہتھیلی سے278 اخروٹ توڑکر بھارت کے پرابھارکر ریڈی کے ایک منٹ میں251 اخروٹ توڑنے کا عالمی ریکارڈ پاش پاش کرڈالا، راشد نسیم نے ایک منٹ میں ٹکرمارکر51 تربوز کا دوسرا ریکارڈ بھی اپنے نام کیا، ان سے قبل 2011 میں جرمنی کے تفزی احمد نے ایک منٹ میں 43 تربوز پھوڑ کر ورلڈ ریکارڈ بنایا تھا۔



راشد نسیم قبل ازیں انڈے توڑنے، سر سے ناریل اور تربوز پھوڑنے سمیت دیگر 25 ریکارڈز قائم کرچکے ہیں۔ عالمی ریکارڈ ہولڈر راشد نسیم نے مسقببل میں پاکستان کے لیے 50 عالمی ریکارڈ قائم کرنے کے عزم کا اظہار کیا ہے۔