پاکستان کپ میں بیٹسمین رننگ بھول گئے رن آؤٹس کی بھرمار

20 بیٹسمین وکٹوں کی درمیان دوڑتے ہوئے بروقت کریز تک پہنچنے میں ناکام

Sports Reporter/Abbas Raza May 08, 2018

20 بیٹسمین وکٹوں کی درمیان دوڑتے ہوئے بروقت کریز تک پہنچنے میں ناکام۔ فوٹو: پی ٹی وی

پاکستان کپ ون ڈے کرکٹ ٹورنامنٹ میں رن آؤٹس کی بھرمار رہی جب کہ مجموعی طور پر 20 بیٹسمین وکٹوں کی درمیان دوڑتے ہوئے بروقت کریز تک پہنچنے میں ناکام رہے۔

فیڈرل ایریاز کی ٹائٹل فتح پر ختم ہونے والے پاکستان کپ میں معمول سے زیادہ رن آؤٹ دیکھنے میں آئے، فیصل آباد میں ہونے والے ایونٹ کی پہلی وکٹ ہی اس انداز میں گری، بلوچستان کے اوپنر نوید ملک 9 اور احمد شہزاد95رنز بناکر فیلڈرز کی مستعدی کے سامنے بے بس ہوگئے،جوابی اننگز میں پنجاب کے زین عباس (47) نے بھی اسی انداز میں وکٹ گنوائی۔

دوسرے میچ میں خیبرپختونخوا کے اوپنر خرم منظور60پر رخصت ہو گئے،اسی اننگز میں آخری 2 بیٹسمین ثمین گل(6) اور صدف حسین(1) بھی رن آؤٹ ہوئے،تیسرے میچ میں افتخار احمد سنچری مکمل کرتے ہی ساتھی بیٹسمین کے ساتھ غلط فہمی کا شکار ہوکر پویلین لوٹ گئے۔

جوابی اننگز میں بلوچستان کے اوپنر بسم اللہ خان نے اسی انداز میں وکٹ گنوائی،پنجاب اور خیبرپختونخوا کا واحد میچ تھا جس میں کوئی رن آؤٹ نہیں ہوا،پانچویں مقابلے میں فیڈرل ایریاز کے اوپنر اویس ضیا(9)کو اس غلطی کا خمیازہ بھگتنا پڑا،جوابی اننگز میں سندھ کے عدنان اکمل(2)نے وکٹ کی قربانی پیش کردی،چھٹے میچ میں بلوچستان کے احمد شہزاد 72پر رن آؤٹ ہوئے۔

ساتویں میچ میں محمد رضوان نے اسی انداز میں 140اورجوابی اننگز میں عابد علی نے 30پر وکٹ گنوائی،آٹھویں مقابلے میں سندھ کے خرم شہزاد(0) اور بلال آصف(11)اسی غفلت کا شکار ہوئے،نویں میچ میں فیڈرل ایریاز کے وقاص مقصود (1)کے بعد بلوچستان کے رضوان حسین رن آؤٹ ہوئے۔

دسویں مقابلے میں پنجاب کے محمد سمیع(2)،سندھ کے عدنان اکمل(19)اپنی ٹیم کیلیے پریشانی کا باعث بنے۔فائنل میں پہلی وکٹ ہی رن آؤٹ سے گری، خرم منظور32رنز تک محدود رہے،جوابی اننگز میں فیڈرل ایریاز نے ایسی کوئی غلطی نہیں کی،مجموعی طور 20بیٹسمین رن آؤٹ ہوئے،فیصل آباد کے سخت گرم موسم کو اس کی ایک وجہ قرار دیا جا رہا ہے۔

ایک کوچ کے مطابق پاکستان کپ کیلیے ٹیموں کا انتخاب کرنے کے بعد مختلف شہروں سے تعلق رکھنے والے کھلاڑیوں کو ایونٹ سے قبل زیادہ پریکٹس کا موقع نہیں ملا،اس لیے رن آؤٹ معمول سے زیادہ دیکھنے میں آئے۔