اقتدار میں آ کر عوام کو صحت تعلیم روزگار بھی دیں گے آصف زرداری

پہلا روزہ لاہور میں جیالوں کے ساتھ افطارکریں گے، عزیز الرحمن، اورنگزیب کی ملاقات

Numainda Express May 10, 2018

پہلا روزہ لاہور میں جیالوں کے ساتھ افطارکریں گے، عزیز الرحمن، اورنگزیب کی ملاقات۔ فوٹو:فائل

KARACHI: پیپلز پارٹی پارلیمنٹیرین کے صدر آصف زرداری نے کہا ہے کہ اقتدار میں آ کر عوام کو صحت، تعلیم، روزگار بھی دیں گے۔

سابق صدر آصف زرداری کا کہنا ہے کہ پیپلز پارٹی پنجاب سے بھرپور الیکشن لڑے گی، ہمارا منشور ہر گھر میں پہنچنا چاہیے، روٹی کپڑا مکان ہی نہیں تعلیم روزگار صحت بھی پیپلزپارٹی کے منشور کا حصہ ہے جس کو پیپلزپارٹی اقتدار میں آ کر لوگوں تک پہنچائے گی۔

پیپلز پارٹی پارلیمنٹیرین کے صدر آصف زرداری پہلا روزہ لاہور کے جیالوں کے ساتھ افطار کریں گے۔ افطار ڈنر کے میزبان پیپلزپارٹی لاہور کے صدر حاجی عزیز الرحمن چن ہوں گے، سابق صدر آصف زرداری سے عزیز الرحمن چن اور اورنگزیب برکی نے ملاقات کی ہے جس میں پہلے افطار ڈنر اور اس کی بعد کی تقاریب پر تبادلہ خیال کیا گیا، افطار پارٹی میں آصف زرداری اور کارکنوں کی بڑی تعداد شریک ہو گی۔