پاکستان سے ڈالر کی افغانستان اسمگلنگ

افغان تاجر اپنی درآمدات کے لیے ایل سی کھولنے پاکستانی کرنسی مارکیٹ کا رخ کر رہے ہیں۔

Editorial May 14, 2018

افغان تاجر اپنی درآمدات کے لیے ایل سی کھولنے پاکستانی کرنسی مارکیٹ کا رخ کر رہے ہیں۔ فوٹو: فائل

اخباری خبر کے مطابق متحدہ عرب امارات (یو اے ای) میں امریکی ڈالر اور دیگر غیرملکی کرنسیوں کو ریگولیٹر کی ڈیکلریشن کے بغیر قبول نہ کرنے کے باعث افغان تاجروں کا دباؤ پاکستانی اوپن کرنسی مارکیٹ پر بڑھ گیا ہے۔

اطلاعات کے مطابق افغان تاجر اپنی درآمدات کے لیے ایل سی کھولنے پاکستانی کرنسی مارکیٹ کا رخ کر رہے ہیں، پاکستان سے 9 کراسنگ پوائنٹس سے آنے جانے والے افغانوں کے ذریعے ڈالر کی اسمگلنگ شروع ہوگئی ہے۔ صرف طورخم سرحد کے ذریعے یومیہ 15 ہزار افراد کی جب کہ دیگر 8 کراسنگ پوائنٹس سے30 سے40 ہزار افراد آتے جاتے ہیں۔

فاریکس ایسوسی ایشن آف پاکستان کے صدر ملک بوستان نے ڈپٹی گورنر اسٹیٹ بینک کو تفصیلات سے آگاہ کرتے ہوئے بتایا کہ پاکستان سے یومیہ ڈیڑھ کروڑ سے2.5 کروڑ ڈالر افغان تاجر خرید کر افغانستان لیجاتے ہیں۔ افغان تاجر ڈالر اور دیگر غیرملکی کرنسی غیرقانونی منی چینجرز سے خرید رہے ہیں جو پاک افغان سرحد سے متصل علاقوں میں قائم ہیں اور وہ غیرقانونی منی چینجرز مارکیٹ ریٹ سے زائد قیمت پر انھیں ڈالر فروخت کر رہے ہیں جس سے منظم اوپن کرنسی مارکیٹ میں دباؤ بڑھتا جا رہا ہے۔

متحدہ عرب امارات کی حکومت نے 4 مئی سے کرنسی امپورٹ سے متعلق اقدامات سخت کر دیے ہیں۔ امریکی ڈالر و دیگر غیرملکی کرنسیوں کی ایک بڑی مقدار چونکہ افغانستان سے یو اے ای درآمد ہوتی تھی اس لیے افغان تاجروں نے اپنی ضروریات کو پوری کرنے کے لیے متبادل طرز عمل اختیار کرتے ہوئے پاکستانی اوپن مارکیٹ کا رخ کر لیا ہے۔

پاکستان میں ڈالر کے نرخ مسلسل بڑھ رہے ہیں ۔ اس صورت حال کا مقابلہ کرنے کے لیے ضروری ہے کہ ڈالر اور دیگر غیرملکی کرنسیوں کی اسمگلنگ کی روک تھام کے لیے کریک ڈاؤن کیا جائے تاکہ پاکستان کی معیشت کو مستحکم رکھا جائے۔