مقبوضہ کشمیر میں بھارتی فورسز کی کارروائی 3 نوجوان شہید

کشمیریوں کے سرینگر، بڈگام ، گاندربل ، شوپیاں ، اسلام آباد سمیت دیگر علاقوں میں بھارت اور اسرائیل کے خلاف مظاہرے

News Agencies May 19, 2018

ریلیاں بھی نکالی گئیں، مظاہرین کو منتشر کرنے کے لیے قابض فوج کی شیلنگ، مظفر آباد میں یوم سیاہ منانے کا اعلان۔ فوٹو : فائل

مقبوضہ کشمیرمیں بھارتی وزیر اعظم نریندر مودی کے کشمیر کے دورے کے خلاف کشمیریوں نے بھرپور احتجاجی مظاہرے کیے جبکہ قابض بھارتی فورسز نے ضلع کپواڑہ میں ماہ رمضان کے دوسرے روز مزید3 کشمیری نوجوانوں کو شہید کر دیا ہے۔

کشمیر میڈیا سروس کے مطابق کشمیریوں نے سرینگر، بڈگام ، گاندربل ، شوپیاں، اسلام آباد سمیت دیگر علاقوں میں بھارت اور اسرائیل کے خلاف زبردست احتجاجی مظاہرے کیے اور ریلیاں نکالیں۔ بھارتی فوجیوں اور پولیس اہلکاروں نے اسلام آباد قصبے اور دیگر علاقوں میں مظاہرین کو منتشر کرنے کیلئے پیلٹ گنز اور آنسو گیس کا بے دریغ استعمال کیا جس سے متعدد افراد زخمی جبکہ مزید 3نوجوان شہید ہوگئے۔

دوسری طرف سید علی گیلانی ، میر واعظ عمر فاروق اور محمد یاسین ملک پر مشتمل مشترکہ حریت قیادت نے بھارتی وزیراعظم نریندر مودی کی آج مقبوضہ وادی میں آمد کے خلاف مظاہروں کی کال دیت ہوئے کہاکہ بھارتی وزیر اعظم نریندر مودی کے مقبوضہ علاقے کے مجوزہ دورے کا مقصد عالمی برادری کو یہ جھوٹا تاثر دینا ہے کہ کشمیری عوام بھارتی جمہوریت کے تحت خوش ہیں حالانکہ بھارت نے مقبوضہ علاقے کو جہنم زار بنارکھا ہے۔

حریت رہنماؤں اورتنظیموں نے لوگوں سے اپیل کی ہے کہ وہ اس موقع پر اپنے گھروں کی چھتوں اور دیگر مقامات پر سیاہ جھنڈے لہرائیں۔

قابض انتظامیہ نے حریت رہنماؤں سیدعلی گیلانی ، محمد یاسین ملک ، محمد اشرف صحرائی سمیت دیگر کو مارچ کی قیادت سے روکنے کیلیے گھروں یا تھانوں میں نظر بند کر دیا جب کہ دوسری طرف آزادکشمیر کے دارلحکومت مظفرآباد میں چیئرمین پاسبان حریت عزیر غزالی کی کال پر آزادکشمیر بھر سمیت مظفرآباد میں یوم سیاہ کے طو ر پر منانے کا اعلان کردیا اِس سلسلے میں مظفر آباد میں شہید مظفروانی چوک پر شدید احتجاجی مظاہرہ کیا گیا جس کی قیادت عزیر غزالی کررہے تھے۔