ایران کو جوہری ہتھیار بنانے کی اجازت نہیں دیں گے امریکا

یورینیم افزودگی کی رپورٹس کا جائزہ لے رہے ہیں، پومپیو، ایران سرخ نشان کے قریب پہنچ گیا، فرانس۔ فوٹو:فائل

---

امریکی وزیر خارجہ مائیک پومپیو نے کہا ہے کہ امریکہ کسی صورت میں بھی ایران کو جوہری ہتھیار تیار کرنے کی اجازت نہیں دے گا۔

مائیک پومپیو نے ایک بیان میں کہا یورینیم افزودگی کی مقدار میں اضافے کے حوالے سے ایرانی رپورٹس کا جائزہ لے رہے ہیں، ایران کو ہمارے عزم کا اندازہ ہے کہ امریکا اسے من مانی کرنے کی اجازت نہیں دے گا۔

خبر ایجنسی کے مطابق امریکی وزارت خارجہ نے کہا کہ ایران کو یورینیئم افزودگی کی اجازت ہر گز نہیں دی جائیگی، امریکہ اور عالمی برادری کے پاس ایران پر دباؤ ڈالنے کے بڑے وسائل موجود ہیں۔ ایران کو کسی بھی قیمت پر ایٹمی عسکری سرگرمی کی اجازت نہیں دی جائیگی۔

ادھر فرانس کے وزیر خارجہ نے کہا ایران کا یہ بیان کہ وہ یورینیئم کی افزودگی کی صلاحیت بڑھائے گا اس کا مطلب یہ ہے کہ وہ سرخ نشان کے قریب پہنچ گیا ہے اور ایٹمی معاہدہ بکھر چکا ہے۔