سی آئی اے کے سابق سربراہوں کی ٹرمپ پر تنقید

صدر ٹرمپ کے اقدامات اور فیصلوں پر عالمی سطح پر ہی نہیں بلکہ ملکی سطح پر تنقید ہو رہی ہے۔

Editorial August 19, 2018

صدر ٹرمپ کے اقدامات اور فیصلوں پر عالمی سطح پر ہی نہیں بلکہ ملکی سطح پر تنقید ہو رہی ہے۔ فوٹو: سوشل میڈیا

امریکا کے جاسوسی کے مرکزی ادارے سی آئی اے کے سابق سربراہوں اور دیگر ریٹائرڈ افسروں نے امریکی صدر ڈونلڈ ٹرمپ کے خلاف مذمت کی ایسی قرارداد جاری کی ہے جس کی امریکی تاریخ میں پہلے کوئی مثال موجود نہیں ہے۔

اخباری اطلاعات کے مطابق سی آئی اے کے 12 سابقہ ڈائریکٹروں اور دیگر انتہائی سینئر اعلیٰ حکام نے اپنے کولیگ جان برینن کو بلیک لسٹ کرنے کے خلاف زبردست احتجاج کیا اور صدر ڈونلڈ ٹرمپ کے اس اقدام کی شدید الفاظ میں مذمت کی ہے۔

ایک بیان میں سی آئی اے کے سابق حکام نے جن کو ری پبلکن اور ڈیموکریٹک صدور نے تعینات کیا تھا ان میں رابرٹ گیٹس، جارج ٹینٹ، لیون پنیٹا اور ڈیوڈ پیٹریاس جیسے نامور لوگ شامل ہیں، نے صدر ڈونلڈ ٹرمپ کی طرف سے برینین کو سیکیورٹی کلیئرنس دینے سے انکار کے فیصلے کی شدید مذمت کرتے ہوئے کہا ہے کہ ایسا ملک کی تاریخ میں پہلے کبھی نہیں ہوا اور نہ اس قسم کی کوئی مثال موجود ہے۔

قرارداد میں صدر ڈونلڈ ٹرمپ کے برینین کے خلاف ایکشن اور دوسرے سی آئی اے حکام کو دھمکیاں دینے کی شدید الفاظ میں مذمت کی گئی ہے۔ سی آئی اے کے سابق حکام کے بیان میں کہا گیا ہے کہ صدر ڈونلڈ ٹرمپ کے اقدامات کا مقصد آزادی اظہار پر قدغن عائد کرنا ہے۔ بیان میں مزید کہا گیا ہے کہ اس سے قبل سی آئی اے حکام کے لیے سیکیورٹی کلیئرنس کا مسئلہ کبھی بھی پیدا نہیں ہوا۔ اس بیان پر دو سی آئی اے افسروں کے دستخط ثبت ہیں جن میں سابق ڈائریکٹر نیشنل انٹیلی جنس جیمز کلیپر اور سابق سی آئی اے ڈائریکٹر مائیکل ہیڈن بھی شامل ہیں۔

ان کے بارے میں صدر ٹرمپ نے کہا ہے کہ سیکیورٹی لسٹ سے ان کا نام حذف کر دیا جائے گا۔ سی آئی اے کے سابق حکام کو ریٹائرمنٹ کے بعد بھی سیکیورٹی کلیئرنس حاصل رہتی ہے تاکہ حاضر سروس افسران ان سے صلاح مشورہ کر سکیں۔ ایوان صدر وہائٹ ہاؤس کی طرف سے کہا گیا ہے کہ برینن صدر ٹرمپ پر نکتہ چینی کرتے تھے لہٰذا ان کو سیکیورٹی کلیئرنس لسٹ سے ہٹا دیا گیا۔ ٹرمپ نے وال اسٹریٹ جرنل کے ساتھ اپنے ایک انٹرویو میں کہا ہے کہ برینن پر روس سے سازباز کرنے کا شک بھی موجود ہے۔

صدر ٹرمپ کے خلاف اس قسم کی باتیں کسی اور امریکی صدر کے بارے میں نہیں کی گئیں۔ صدر ٹرمپ کے اقدامات اور فیصلوں پر عالمی سطح پر ہی نہیں بلکہ ملکی سطح پر تنقید ہو رہی ہے۔ سی آئی اے کے سابق حکام کا صدر ٹرمپ کی مذمت کرنا ایک غیرمعمولی اقدام ہے اور اس کی امریکی تاریخ میں نظیر نہیں ملتی۔ صدر ٹرمپ کی ایران پالیسی پر بھی امریکا میں تحفظات کا اظہار کیا جا رہا ہے جب کہ ترکی کے ساتھ بھی انھوں نے کشیدگی کو بڑھا لیا ہے۔یوں دیکھا جائے تو صدر ٹرمپ کی مشکلات میں مسلسل اضافہ ہورہا ہے۔