لاپتہ افراد کی بازیابی محکمہ داخلہ آئی جی ڈی جی رینجرز و دیگر کو نوٹس

جے آئی ٹی اگرلاپتہ افرادکا سراغ نہیں لگا سکتی تو سیشن کیوں کرتی ہے،جسٹس نعمت اللہ پھلپھوٹو کے ریمارکس۔ فوٹو:فائل

---

ہائی کورٹ نے سے60 زائد لاپتہ افرادکی کی بازیابی سے متعلق درخواستوں پر محکمہ داخلہ سندھ، آئی جی سندھ، ڈی جی رینجرز اور دیگر کو نوٹس جاری کردیے۔

جسٹس نعمت اللہ پھلپھوٹو اور جسٹس کے کے آغا پر مشتمل دو رکنی بینچ کے روبرو 60سے زائد لاپتہ افراد کی بازیابی سے متعلق درخواستوں کی سماعت ہوئی،2گمشدہ بیٹوں کی ماں حسن بانو نے کمرہ عدالت میں آہ وبکا کرتے ہوئے کہا کہ میرے بیٹے حنیف اور سہیل کئی ماہ سے لاپتہ ہیں ،کوئی فریاد سننے والانہیں اس لیے انصاف کے لیے عدالت آئی ہوں، بہت تکلیف میں ہوں، ماں کے دل پر کیا گزرتی ہے کوئی نہیں جانتا، بیٹوں کو بازیاب کرایا جائے۔

لاپتہ شہریوں کی عدم بازیابی پر عدالت برہم ہوگئی، عدالت نے استفسار کیا کہ جے آئی ٹی والے اگر لاپتہ افراد کا سراغ نہیں لگا سکتی تو سیشن کیوں کرتے ہیں؟عدالت نے ریمارکس دیے خدشہ ہے کہ لوگوں کا اداروں سے اعتماد ہی نہ اٹھ جائے۔

جسٹس نعمت اللہ پھلپھوٹو نے ریمارکس میں کہا کہ لاپتہ افراد کی بازیابی کے لیے ہرممکن اقدامات کیے جائیں، پولیس اور دیگر اداروں کی غفلت اور لاپرواہی برداشت سے باہر ہوتی جارہی ہے۔

عدالت نے تمام اداروں کو لاپتہ افراد کی بازیابی کے مشترکہ کوششیں کرنے اور لاپتہ افراد کو بازیاب کراکے ایک ماہ میں رپورٹ پیش کرنے کا حکم دیتے ہوئے لاپتہ افراد کی بازیابی سے متعلق نئی درخواستوں پر محکمہ داخلہ سندھ آئی جی سندھ، ڈی جی رینجرز اور دیگر کو نوٹس جاری کرتے ہوئے ایک ماہ میں جواب طلب کرلیا۔