ہائر ایجوکیشن کمیشن کا اقدام سانحہ کرائسٹ چرچ میں شہید طالبعلم اشتہاری قرار

نیوزی لینڈ حکومت کی جاری کردہ شہدا کی لسٹ ماننے سے انکار، ہائیر ایجوکیشن کمیشن کو علیحدہ لیٹر جاری کروانے پر اصرار۔ فوٹو:فائل

---

ہائیر ایجوکیشن کمیشن نے کرائسٹ چرچ سانحے میں شہید ہونے والے پاکستانی طالب علم کو اشتہاری قرار دے کر رقم ریکوری کا نوٹس بھجوا دیا جس میں شہید طالبعلم ہارون محمد کو 3 کروڑ 67 لاکھ 8 سو 22 روپے فوری جمع کرانے کی ہدایت کی گئی ہے۔

ایچ ای سی کے خط میں شہید طالبعلم کے لیے ''اشتہاری'' کا لفظ استعمال کیا گیا ہے۔ مذکورہ طالبعلم این ای سی کے اسکالر شپ پر نیوزی لینڈ میں ایم بی اے کی تعلیم حاصل کررہا تھا۔

ذرائع کے مطابق نیوزی لینڈ کے شہر کرائسٹ چرچ میں 15مارچ کو دہشت گردوں کے مساجد پر حملے میں 50مسلمان شہید ہوئے جن میں پاکستانی طالبعلم ہارون محمد بھی شامل تھا، شہادت کے بعد نیوزی لینڈ اور پاکستان کی حکومتوں نے شہید کو اعزازات سے بھی نوازا۔

ہائیر ایجوکیشن کی خاتون افسر نے ان کو شہید ماننے سے انکار کردیا اور حکومت نیوزی لینڈ کی طرف سے جاری کردہ شہدا کے ناموں کی فہرست اور ای میل کے باوجود بھی اس حقیقت کو ماننے سے انکار کیا کہ وہ اس افسوسناک واقعے کے نتیجے میں دنیا میں موجود نہیں ہے۔

ہائیر ایجوکیشن کمیشن کے لیٹر کے مطابق اسلام آباد کے سیکٹرجی نائن کے رہائشی ہارون محمد کے نام تحریر کیا کہ آپ ہائیر ایجوکیشن کمیشن کو 36700,822روپے ڈی جی فنانس کے نام پے آرڈر کی صورت میں جمع کرائیں بصورت دیگر آپ کے خلاف کارروائی کی جائے گی۔

شہید کی فیملی کے مطابق ہائیر ایجوکیشن میں تعینات خاتون آفیسر جو پراجیکٹ ڈائریکٹر ہیں کو بتایا گیا تھا کہ ہارون محمود سانحہ کرائسٹ چرچ میں شہید ہوچکے ہیں۔

مذکورہ خاتون افسر کو نیوزی لینڈ حکومت کی طرف سے جاری کردہ شہدا کی لسٹ بھی فراہم کی گئی لیکن اس نے ان لسٹ کو ماننے سے انکار کردیا،اور اصرار کیا کہ نیوزی لینڈ کی حکومت کی طرف سے ان کے لیے علیحدہ ذاتی طور پر ہائیر ایجوکیشن کمیشن کو لیٹر جاری کروایا جائے، ایچ ای سی، ای میل کو نہیں مانے گا۔

ہائیر ایجوکیشن کمیشن کی ترجمان عائشہ اکرام نے رابطہ کرنے پر بتایا کہ مذکورہ طالبعلم اپنی ڈگری مکمل کرنے کے بعد بھی بیرون ملک مقیم تھا تاہم اب اس کا ڈیتھ سرٹیفیکیٹ لگا کر فائل کو بند کر دیا جائے گا۔