متحدہ اور ن لیگ کی دوستی زیادہ دیر کی نہیں شیخ رشید

بھارت حافظ سعید اور صلاح الدین کو قتل کرانا چاہتا ہے،سربراہ عوامی مسلم لیگ کا انٹرویو۔ فوٹو: فائل

---

عوامی مسلم لیگ کے سربراہ شیخ رشید احمد نے کہا ہے کہ ن لیگی حکومت صرف ذاتی مفادات کے تحفظ میں مصروف ہے، ایم کیو ایم اورن لیگ کی دوستی زیادہ دیر چلتی نظر نہیں آ تی۔

اپنے ایک انٹرویو میں انہوں نے کہا کہ اپوزیشن میں وہی کامیاب ہو گا جو ایوانوں میں کرسی میں بیٹھنے کے بجائے سڑکوں پر آکر عوام کے حقوق کی بات کرے گا، موجودہ حکومت میں کچھ لوگ اپنے کاروبار کی وجہ سے بھارت کی آنکھوں میں آنکھیں ڈال کر بات نہیں کرنا چاہتے، 25ہزار سے کم میں مردے کا جنازہ اور دیگر معاملات مکمل نہیں ہوتے، مہنگائی میں اتنا اضافہ ہو چکا ہے کہ لوگوں کو مردے دفنانے کےلئے بھی قرض لینا پڑتا ہے۔



شیخ رشید نے کہاکہ حافظ محمد سعید کے سیکیورٹی افسر کو بھی قتل کرانے کے پیچھے بھارت کی سازش بے نقاب ہوچکی ہے اور اب بھارت پروفیسر حافظ محمدسعید اور سید صلاح الدین کو بھی قتل کرانا چاہتا ہے ۔ بہت سے مواقع پر پیپلزپارٹی تحریک انصاف اور ق لیگ پارلیمنٹ میں ایک موقف اپنا چکی ہیں اور اس لیے میں سمجھتا ہوںکہ اپوزیشن کا گرینڈ الائنس بھی بن سکتا ہے اور موجودہ حالات میں اپوزیشن کا گرینڈ الائنس اور سڑکوں پر آنا بھی ضروری ہے کیونکہ ن لیگ حکومت تاحال مکمل طور پر ناکام دکھائی دے رہی ہے۔ دہشت گردی ، بے روزگاری سمیت دیگر عوامی مسائل میں کمی کے بجائے اضافہ ہی ہواہے اور ڈالر 104روپے تک جا پہنچا ہے۔