افغانستان بم دھماکا اور جھڑپیں 32 طالبان سمیت 40 افراد ہلاک

ہلمند میں 25 اور ہرات میں7 طالبان مارے گئے۔ فوٹو؛ اے ایف پی

---

افغانستان میں بم دھماکے اور جھڑپوں کے دوران 40 افراد ہلاک اور متعدد زخمی ہوگئے۔

ذرائع ابلاغ کے مطابق صوبہ پروان میں سڑک کنارے نصب بم دھماکے سے کان کنی کی ایک پرائیویٹ کمپنی کے 8 مزدور جاں بحق اور 5 زخمی ہوگئے، صوبائی گورنر عبدالبصیر سالانگی نے واقعہ کی تفصیلات بتاتے ہوئے کہا کہ صوبہ میں کرومائیٹ کی کان میں کام کرنے والی ایک پرائیویٹ کمپنی کے مزدور اور سیکیورٹی گارڈز ایک وین میں جارہے تھے کہ اس دوران وین سڑک کنارے نصب بم سے ٹکرا کر مکمل طور پر تباہ ہوگئی جس میں 8افراد ہلاک اور5 زخمی ہوگئے جنکی حالت تشویشناک بتائی جاتی ہے۔



اے پی پی کے مطابق صوبہ ہلمند کے قصبہ گریشک میں اتوار کو سکیورٹی فورسز اور طالبان کے درمیان سخت جھڑپ میں 25 شدت پسند مارے گئے۔ فورسز نے متعدد جنگجوئوںکو گرفتار بھی کرلیا۔ اے ایف پی کے مطابق صوبہ ہرات کے ضلع گوزارا میں فورسز کے جھڑپ کے دوران کمانڈر اکبر نشین سمیت 7 طالبان مارے گئے۔ علاوہ ازیں افغان صدر حامد کرزئی نے کہا ہے کہ عسکریت پسندوں کوافغان عوام کی اموات کیلیے جواب دہ ہونا پڑے گا۔