ہفتہ رفتہ دھاگہ و کپاس برآمد کیساتھ روئی کی قیمتوں میں بھی زبردست تیزی

آئی سی اے لیور پول نے معاہدے پورے نہ کرنے پر 53 ٹیکسٹائل ملز کو ڈیفالٹر قرار دیدیا، توانائی بحران کے باعث ایسا ہوا، احسان الحق فوٹو: فائل

---

ISLAMABAD: دنیا بھر کے کاٹن بائرز کی جانب سے نیویارک کاٹن ایکس چینج میں دسمبر اور مارچ کیلیے روئی خریداری رجحان میں غیر معمولی اضافے اور چین کی جانب سے اپنے روئی کے نیشنل ریزروز کیلیے روئی کی خریداری شروع کرنے کی اطلاعات کے باعث گزشتہ ہفتے کے دوران نیوریارک کاٹن ایکسچینج میں جبکہ پاکستان سے سوتی دھاگے اور خام کپاس کی بیرون ملک برآمد کے زبردست تیزی کے رجحان کے باعث پاکستان میں روئی کی قیمتوں میں زبردست تیزی کا رجحان سامنے آیا اور توقع ظاہر کی جا رہی ہے کہ رواں ہفتے بھی تیزی کا یہ رجحان جاری رہے گا۔

پاکستان کاٹن جنرز ایسوسی ایشن (پی سی جی اے ) کے سابق ایگزیکٹو ممبر احسان الحق نے ''ایکسپریس '' کو بتایا کہ ڈالر کے مقابلے میں بھارتی روپے کی قدر میں زبردست کمی کے باعث بھارتی برآمد کنندگان کیلیے چین کو برآمد کیے جانے والے سوتی دھاگے کے برآمدی آرڈرز میں زبردست کمی ہونے کے باعث چینی درآمد کنندگان نے اب پاکستان سے سوتی دھاگہ درآمد کرنے کا فیصلہ کیا ہے جبکہ ملکی تاریخ میں پہلی بار اگست اور ستمبر میں پاکستان سے بڑے پیمانے پر روئی برآمد ہونے سے پاکستانی ٹیکسٹائل ملز مالکان اور روئی برآمد کنندگان نے گزشتہ ہفتے کے دوران روئی خریداری رجحان میں کافی اضافہ کر دیا تھا جس کے باعث گزشتہ ہفتے کے دوران سندھ میں روئی کی قیمتیں 300 روپے فی من اضافے کے ساتھ 7 ہزار 100 روپے جبکہ پنجاب میں 200 روپے فی من اضافے کے ساتھ 7 ہزار فی من تک پہنچ گئیں جبکہ پھٹی کی قیمتیں بھی موجودہ سیزن کی بلند ترین سطح 3 ہزار 350 روپے فی 40 کلو گرام تک پہنچ گئیں۔

انہوں نے بتایا کہ یکم جولائی سے 7 ستمبر تک پاکستان سے مجموعی طو رپر روئی کی 1 لاکھ 75 ہزار بیلز کی برآمدی رجسٹریشن کروائی گئی جبکہ عملی طور پر 1 لاکھ 400 بیلز بیرون ملک برآمد کی گئیں جن میں سے تائیوان کو 27 ہزار 662 بیلز، چائنہ کو 20ہزار 819، انڈونیشیا کو 20 ہزار 309، ویت نام کو 14 ہزار 423، بھارت کو 6 ہزار 904، بنگلہ دیش کو 6 ہزار 248، تھائی لینڈ کو 3 ہزار 320 جبکہ فلپائن کو 719 روئی کی بیلز برآمد کی گئیں۔ احسان الحق نے بتایا کہ زراعت کے بارے میں دنیا کے دو بڑے اور مستند اداروں یونائیٹڈ اسٹیٹس ڈپارٹمنٹ آف ایگریکلچر (یو ایس ڈی اے) اور انٹر نیشنل کاٹن ایڈوائزری کمیٹی (آئی سی اے سی) کی جانب سے دنیا بھر میں کپاس کی پیداوار، کھپت اور اینڈنگ اسٹاکس کے بارے میں جاری ہونے والی رپورٹس میں غیر معمولی تضاد کے باعث دنیا بھر میں کپاس سے متعلق بیشتر اسٹیک ہولڈرز کا خیال ہے کہ ان دونوں اداروں کو سٹہ باز اپنے مطلوبہ نتائج حاصل کرنے کیلیے استعمال کر رہے ہیں تاکہ چھوٹے سرمایہ کاروں کو مارکیٹ سے آؤٹ کر کے خود زیادہ سے زیادہ نفع کمایا جا سکے۔



انہوں نے بتایا کہ چند روز قبل آئی سی اے سی کی جانب سے جاری ہونے والی رپورٹ کے مطابق دنیا بھر میں کپاس کی پیداوار پچھلے ماہ جاری ہونے والے تخمینوں کے مقابلے میں 40 ہزار ٹن کم پیدا ہوگی جبکہ یو ایس ڈی اے کی جانب سے جاری ہونے والی رپورٹ میں کپاس کی پیداوار پچھلے ماہ کے مقابلے میں 2 لاکھ 26 ہزار ٹن زیادہ ہونے بارے رپورٹس جاری کی گئی ہیں جبکہ آئی سی اے سی کی جانب سے مذکورہ رپورٹ میں 2013-14ء کے آخر میں دنیا بھر میں روئی کے اینڈنگ اسٹاکس پچھلے ماہ کے مقابلے میں 5 لاکھ 90 ہزار ٹن کم ہونگے جبکہ یو ایس ڈی اے کی جانب سے جاری ہونے والی رپورٹ کے مطابق مذکورہ اینڈنگ اسٹاکس پہلے کے مقابلے میں 2 لاکھ 9 ہزا ر ٹن مزید بڑھ جائیں گے۔

انہوں نے بتایا کہ گزشتہ ہفتے کے دوران نیویارک کاٹن ایکسچینج میں حاضر ڈیلوری روئی کی قیمتیں 2 سینٹ فی پاؤنڈ اضافے کے ساتھ 90.35 سینٹ فی پاؤنڈ ،اکتوبر ڈیلوری روئی کے سودے 1.97 سینٹ فی پاؤنڈ اضافے کے ساتھ 85.21 سینٹ فی پاؤنڈ، بھارت میں روئی کی قیمتیں ریکارڈ 750 روپے فی کینڈی مندی کے بعد 46 ہزار 803 روپے فی کینڈی، چائنہ میں روئی کی قیمتیں 55 یو آن فی ٹن مندی کے بعد 20 ہزار 945 یو آن تک گر گئیں جبکہ کراچی کاٹن ایسوسی ایشن میں روئی کے اسپاٹ ریٹ 200 روپے فی من اضافے کے ساتھ 6 ہزار 900 روپے فی من تک پہنچ گئے۔ انہوں نے بتایا کہ انٹر نیشنل کاٹن ایسوسی ایشن (آئی سی اے) لیور پول کی جانب سے جاری ہونے والی تازہ ترین ڈیفالٹ لسٹ میں 53 پاکستانی ٹیکسٹائل ملز کو بھی ڈیفالٹر قرار دے دیا گیا ہے جو بین الاقوامی سطح پر کاٹن پروڈکٹس کی خرید یا فروخت بارے معاہدوں کو پایہ تکمیل تک پہنچانے میں ناکام رہے تھے اور ان ٹیکسٹائل ملز میں بعض بڑے بڑے نام بھی شامل ہیں۔