دریاؤں کا رخ بدلنے کی بھارتی گیدڑ بھبکی

نریندر مودی کے اشتعال انگیزبیانات دنیا کی آنکھیں کھولنے کے لیے کافی ہیں جس سے جنوبی ایشیاء اور دنیا کے امن کوخطرہ ہے۔ (فوٹو: فائل)

---

ترجمان دفتر خارجہ ڈاکٹر محمد فیصل نے کہا ہے کہ پاکستان سندھ طاس معاہدے کے تحت تین مغربی دریاؤں پر حق رکھتا ہے۔ ان دریاؤں کا رخ تبدیل کرنے کا بھارتی اقدام جارحیت تصور کیا جائے گا اور پاکستان اس پر جواب دینے کا حق رکھتا ہے۔

ہفتہ وارپریس بریفنگ میں بھارتی وزیر اعظم مودی کے بیان پر سخت رد عمل کا اظہار کرتے ہوئے ترجمان دفترخارجہ نے کہا کہ بھارت مقبوضہ کشمیر کو جہاں لے گیا ہے وہاں سے اب واپسی کا راستہ نہیں مل رہا، پاکستان کی کوششوں سے بھارت عالمی سطح پر تنہا اور بند گلی میں داخل ہو چکا ہے ۔ بلاشبہ مودی سرکار کی بدنیتی اور خطے کے امن وسلامتی کو لاحق خطرات کے پیش نظر اس حقیقت سے دنیا واقف ہوچکی کہ بھارت کشمیریوں پر مظالم کی آڑ میں اپنے دیگر مکروہ عزائم کی تکمیل میںبھی جنونی ہوگیا ہے۔

اس کے جنگی جنون کا عالم یہ ہے کہ وہ طاس سندھ کے معاہدے کو خاطر میں نہیں لارہا،اور پاکستان کے خلاف لاف زنی سے باز نہیں آرہا۔ اب اس نے گیدڑ بھبکی دی ہے کہ مغربی دریاؤں کا رخ تبدیل کردے گا۔ ترجمان دفتر خارجہ نے درست فرمایا کہ بھارت کا یہ اقدام جارحیت کہلائے گا ۔

ویسے بھی عالمی برادری کو سوچنا چاہیے کہ کشمیر پر جارحیت کو بھارت نے کھلی چھوٹ سمجھ رکھا ہے، مودی کو اس کی مہم جوئی سے روکنے کی فوری ضرورت ہے، دنیا نے بھارت کا اصلی چہرہ دیکھ لیا ہے حیرت ہے کہ عالمی قوتیں چپ ہیں ۔ اسی سے مودی کو شہ مل رہی ہے ۔ نریندر مودی کے اشتعال انگیز بیانات دنیا کی آنکھیں کھولنے کے لیے کافی ہیں جس سے جنوبی ایشیاء اور دنیا کے امن کو خطرہ ہے۔

ان کی کوئی حرکت کسی تزویراتی غلط فہمی کا باعث بن سکتی ہیں۔مودی کے حالیہ بیانات بی جے پی حکومت کے بین الاقوامی قوانین اور اصولوں کو پاؤں تلے روندتے ہوئے ایک غیر ذمے دارانہ اور جارح پسند ریاست کے عکاس اور مقبوضہ کشمیر میں جاری مظالم اور انسانی حقوق کی سنگین خلاف ورزیوں سے عالمی توجہ ہٹانے کی ناکام کوشش ہے۔

کرتار پور راہداری سے متعلق ترجمان نے کہا کہ ہماری طرف سے راہداری پر کام تقریباً مکمل ہو چکا ہے اس سلسلے میں دیگر تفصیلات جلد متوقع ہیں۔ بھارت یاد رکھے کہ مقبوضہ وادی میں کشمیریوں نے کرفیو توڑ کر شہدا کے جنارے میں شرکت کی، مودی کے ہتھکنڈے کشمیریوں کو آزادی کی جدوجہد سے نہیں روک سکتے۔ کشمیریوں نے عہد کر رکھا ہے کہ مودی کو وادی سے رسوا ہوکر نکلنا ہوگا۔