اندرون ملک فضائی سفر پر 600 روپے ٹیکس عائد

پی آئی اے نے کراچی سے ژوب کیلیے ہفتہ وار 2 پروازوں کا آغاز کر دیا۔ فوٹو: فائل

---

لاہور،کراچی، اسلام آباد سمیت ملک بھر کیلیے فضائی سفر کرنے والوں پرسول ایوی ایشن اتھارٹی کی جانب سے ٹکٹ پر 600 روپے کے نئے ٹیکس عائد کر دیے گئے۔

17مئی سے پہلے خریدے گئے ٹکٹ پر سفر سے پہلے اضافی 600 روپے لیے جائیں گے۔ٹکٹ پر 100 روپے سیکیورٹی فیس اور 500 روپے ایمبارکشن فیس لی جائے گی۔ 17مئی کے بعد خریدے گئے ٹکٹ میں اضافی ٹیکس شامل ہے۔

مسافروں کا کہنا ہے کہ پہلے سے خریدے گئے فضائی ٹکٹ پر 600 روپے کا ٹیکس لگانا ناانصافی ہے اور پہلے سے خریدے گئے ٹکٹ پر اضافی چارجز کیسے لگائے جاسکتے ہیں۔ دوسری جانب پی آئی اے کی جانب سے کراچی سے ژوب کیلیے ہفتہ وار دو پرواز وں کا آغاز کر دیا گیا۔

ترجمان پی آئی اے عبداللہ خان کے مطابق پہلی پرواز منگل کی صبح کراچی سے ژوب کیلیے روانہ ہوئی، جناح انٹرنیشنل ائیرپورٹ کراچی پر پرواز کی روانگی سے قبل ایک افتتاحی تقریب منعقد کی گئی اور کیک کاٹا گیا،پرواز کے آغاز پر مسافروں نے سی ای او پی آئی اے ایئر مارشل ارشد ملک اور ایئر لائن انتظامیہ کا شکریہ ادا کیا۔

سی ای او ارشد ملک کا کہنا تھا کہ مسافروں کو بہترین سروس فراہم کی جائیں،پرواز کے آغاز سے ژوب اور کراچی کے شہر یو ں اور کاروباری برادر ی کا درینہ مطالبہ پورا ہو گیا، پی آئی اے کراچی ژوب کراچی کیلیے ہر منگل اور جمعہ کو فلائٹ آپریٹ کرے گی۔