کراچی پولیس نے 8 کروڑ کی آئس برآمد کرلی 4 ملزمان گرفتار

گرفتار ملزمان واٹس ایپ اور سوشل میڈیا کے ذریعے کراچی کے پوش علاقوں میں آئس اور دیگر منشیات سپلائی کرتے تھے، پولیس۔(فوٹو: فائل)

---

KARACHI: موچکو پولیس نے 4 منشیات فروشوں کو گرفتار کر کے مجموعی طور پر 11 کلو آئس اور 9 کلو چرس برآمد کرلی۔

موچکو پولیس نے کروڑوں روپے مالیت کی منشیات اسمگل کرنے کی کوشش ناکام بناتے ہوئے 4 ملزمان کو گرفتار کرکے آئس منشیات کی بڑی کھیپ پکڑ لی جس کی بین الاقوامی مارکیٹ میں مالیت 8 کروڑ روپے ہے۔

ڈی آئی جی ساؤتھ جاوید اکبر ریاض نے پریس کانفرنس میں بتایا کہ پولیس نے رکشے میں مسافر بن کر منشیات اسمگل کرنے والے گرفتار 3 منشیات فروشوں کی نشاندہی پر ان کے چوتھے ساتھی کو بھی گرفتار کر کے منشیات کی بھاری مقدار برآمد کرلی، ملزمان سے مجموعی طور پر 11 کلو آئس اور 9 کلو چرس برآمد ہوئی۔

اس حوالے سے ڈی آئی جی ساؤتھ نے بتایا کہ کراچی پولیس چیف عمران یعقوب منہاس کے احکا مات پر گزشتہ ماہ سے شہر بھر میں منشیات فروشی کے خلاف خصوصی مہم کا آغاز کیا گیا جس میں اسنیپ چیکنگ، سرچ آپریشن اور خفیہ معلومات پر منشیات فروشوں کی فہرستیں تیار کر کے ٹارگٹڈ کارروائیوں کا آغاز کیا گیا۔

جب کہ بلوچستان سے آنے والی گاڑیوں کے لیے حب ریور روڈ ناکہ بندی کا آغاز کیا گیا جس میں خواتین پولیس اہل کاروں و افسران کے ہمراہ بھاری نفری کو تعینات کیا گیا تاکہ بلوچستان کی جانب آنے والی تمام گاڑیوں کی چیکنگ کی جا سکے۔ اور گزشتہ روز ایس ایچ او موچکو ندیم احمد کی سربراہی میں پولیس پارٹی نے حب ریور روڈ لکی چڑھائی ناکے پراسنیپ چیکنگ کے دوران بلوچستان سے آنے والے رکشے کو روک کر اس بیٹھے ہوئے 3 مسافروں کے سامان کی تلاشی لی تو رکشے میں رکھے ہوئے کمبل سے 10 پلاسٹک کے باکس ملے جس سے 10 کلو آئس ساڑھے چار کلو چرس بھی برآمد ہوئی۔

پولیس نے 3 ملزمان حاجی محسن، نثار احمد اور عمران کو گرفتار کر کے تھانے منتقل کر دیا۔ ابتدائی تحقیقات کے دوران گرفتار ملزم حاجی محسن کی نشاندہی پر اس کے چوتھے ساتھی نصیر کو رئیس گوٹھ بس اسٹاپ کے قریب چھاپہ مار کر گرفتار کرلیا جس کے قبضے سے 1050 گرام آئس اور ساڑھے چار کلو چرس برآمد ہوئی۔

جاوید اکبر ریاض نے کہا کہ موچکو پولیس کے ہاتھوں پکڑی جانے والی مہلک منشیات آئس کی اب تک پکڑی جانے والی سب سے بڑی کھیپ ہے جس کی انٹرنیشنل مارکیٹ میں مالیت 8 کروڑ روپے ہے جب کہ گرفتار منشیات فروش حاجی محسن پورے نیٹ ورک کا مرکزی کردار ہے۔

انھوں نے بتایا کہ گرفتار منشیات فروشوں سے ان کے گروہ میں شامل دیگر کارندوں کے حوالے سے معلومات حاصل کی جا رہی ہے جبکہ منشیات فروشوں کے حوالے سے ساؤتھ زون پولیس کی مرتب کی جانے والی فہرستوں پر چھاپہ مار کارروائیوں کا بھی سلسلہ جاری ہے۔

گرفتار منشیات فروشوں کا آبائی تعلق کوئٹہ سے اور وہ کراچی میں ڈیفنس، کلفٹن اور دیگر پوش علاقوں میں آئس اور دیگر منشیات سپلائی کرتے تھے۔ ملزمان منشیات کی سپلائی کے لیے واٹس ایپ اور دیگر سوشل میڈیا ایپس کا استعمال کرتے ہیں

جاوید اکبر ریاض کے مطابق بلوچستان کے 2 سے 3 علاقوں میں منشیات کے اہم ڈیلر بیٹھے ہیں اور اب تک کی تحقیقات میں ڈاکٹر بلوچ نامی شخص منشیات کے بڑے ڈیلر کے طور پر سامنے آیا ہے جس کے کچھ بینک اکاؤنٹس کا پتہ چلا ہے اور پولیس اس پر کام کر رہی ہے۔