شام میں فوج کی بمباری بم دھماکے 16 افراد ہلاک

حلب میں ہی 2 کار بم دھماکوں کے نتیجے میں 7 افراد ہلاک ہو گئے۔فوٹو:رائٹرز

---

شام میں فوج کی بمباری اور 2 بم دھماکوں کے نتیجے میں16 افراد ہلاک ہوگئے۔

ذرائع ابلاغ کے مطابق صدر بشارالاسد کی حامی فوج نے شمالی شہر حلب میں باغیوں کے ٹھکانوں پر بمباری کی جس میں 9 افراد ہلاک اور متعدد زخمی ہوگئے جبکہ حلب میں ہی 2 کار بم دھماکوں کے نتیجے میں 7 افراد ہلاک ہو گئے۔ شامی حکومت نے کہا ہے کہ باغیوں سے کوئی رعایت نہیں ہوگی۔ ادھر امریکی وزیرِ خارجہ جان کیری نے روس پر زور دیا ہے کہ وہ کیمیائی ہتھیاروں کے ذخیرے کے منتقلی کے عمل کو تیز کرنے کیلیے شامی حکومت پر دباؤ ڈالے۔



غیر ملکی میڈیا کے مطابق اپنے روسی ہم منصب وزیرِ خارجہ سرگئی لاوروو سے جرمنی کے شہر میونخ میں سکیورٹی کانفرنس کے دوران ملاقات کے دوران جان کیری نے سرگئی لاوروف پر زور دیا کہ'وہ شامی حکومت پر باقی ماندہ کیمیائی ہتھیاروں کو لتاکیہ کے بندر گاہ پر پہنچانے میں تیزی لانے کیلئے دبائو ڈالے۔ انہوں نے کہا کہ اگر شام نے وعدے پورے نہ کیے تو دمشق کے خلاف فوجی کارروائی کا امکان بھی موجود ہے۔