کراچی آپریشن میں کسی سے زیادتی کے حق میں نہیں بلیغ الرحمن

حکومت اپنی ذمے داریوں سے آگاہ ہے حالات سنگین ہیں جو ملک وقوم کیلیے بہتر ہے حکومت وہی کررہی ہے۔رہنما ن لیگ۔ فوٹو: فائل

---

مسلم لیگ ن کے رہنما بلیغ الرحمن نے کہا ہے کہ حکومت اپنی ذمے داریوں سے آگاہ ہے حالات سنگین ہیں جو ملک وقوم کیلیے بہتر ہے حکومت وہی کررہی ہے۔

ایکسپریس نیوز کے پروگرام کل تک میں میزبان جاوید چوہدری سے گفتگو میں انھوں نے کہا ہم نے آپریشن کے حوالے سے کراچی میں جو بھی ملاقاتیں کیں ان میں گورنر سندھ موجود تھے،آپریشن میں کسی سے زیادتی کے حق میں نہیں۔ پیپلزپارٹی کے رہنما صمصام بخاری نے کہا کراچی میں آپریشن ایم کیو ایم کی خواہش پر ہی ہوا ہے،اگر کسی سے کوئی زیادتی ہوئی ہے تو اس کا ازالہ ہونا چاہئے،ایم کیو ایم کو غیر نہیں سمجھتے لیکن ایم کیو ایم کسی بھی حکومت میں سیٹوں کے بغیر شامل نہیں ہوئی۔

تحریک انصاف کے رہنما شوکت یوسفزئی نے کہا کہ آپریشن صحیح ہو ہی نہیں رہا، ایم کیو ایم کے ساتھ اگر کراچی آپریشن میں کوئی زیادتی ہورہی ہے تو اس کی تحقیقات ہونی چاہئیں لیکن یہ نہیں کہ کراچی پر قبضہ کرلیا جائے۔ متحدہ کے رہنما ساجد احمد نے کہا کراچی کے ٹارگٹڈ آپریشن میں اب تک 12کارکن مارے جا چکے ہیں پولیس کی تحقیقاتی کمیٹی بھی پولیس کے لوگوں پر ہی مبنی ہے،کراچی کے ٹارگٹڈ آپریشن کیلیے ایک کمیٹی بنائی جانی چاہیے۔ انھوں نے کہا اگر ایم کیو ایم میں دہشتگرد ہوتے تو کراچی کے لوگ بار بار مینڈیٹ نہ دیتے۔