گرین شرٹس اندھیروں میں امید کی کرن ڈھونڈنے لگے

سلیم خالق  ہفتہ 29 اکتوبر 2022
اگلے تینوں میچز میں فتح کے ساتھ رن ریٹ کو بھی بہتر بنانا ہوگا (فوٹو: ٹوئٹر)

اگلے تینوں میچز میں فتح کے ساتھ رن ریٹ کو بھی بہتر بنانا ہوگا (فوٹو: ٹوئٹر)

پرتھ: ٹی ٹوئنٹی ورلڈکپ میں مایوسی کے اندھیروں میں گم گرین شرٹس امید کی گرن ڈھونڈنے لگے۔

ورلڈکپ میں بلند عزائم کے ساتھ میدان میں اترنے والی پاکستان ٹیم کو ابھی تک دونوں میچز میں شکست ہوئی ہے، میلبورن میں بھارت نے سنسنی خیز مقابلے میں شکست دی تو امید تھی کہ گرین شرٹس زمبابوے کیخلاف بھرپور کم بیک کرتے ہوئے بڑے مارجن سے فتح حاصل کریں گے مگر پرتھ میں کھیلے جانے والے اس میچ میں بھی شکست کا سامناکرنا پڑا۔

پاکستان کیلیے سیمی فائنل میں جگہ بنانے کیلیے سفر انتہائی دشوار ہوگیا ہے،ممکنات کا ایک گورکھ دھندا شروع ہوگیا ہے جس میں اگر مگر کی صورتحال میں کئی چیزوں کا پاکستان کے حق میں ہونا ضروری ہوگا۔

پاکستان ٹیم کو اتوار کو شیڈول نیدرلینڈز کیخلاف میچ جیتنے کے بعد جنوبی افریقہ اور بنگلہ دیش کو بھی مات دینا ہوگی، ان میچز میں نیٹ رن ریٹ بھی بہتر کرنا ہوگا،ابھی تک گروپ 2میں شامل ہر ٹیم 2،2 میچ کھیل چکی، بھارت 4 پوائنٹس کے ساتھ پہلی، ایک باہمی میچ بارش زدہ ہونے کی وجہ سے جنوبی افریقہ اور زمبابوے 3،3 پوائنٹس کے ساتھ دوسری اور تیسری پوزیشن پر ہیں، بنگلہ دیش 2 پوائنٹس کے ساتھ چوتھے نمبر پر ہے۔

پاکستان اور نیدرلینڈز نے ابھی تک کوئی کھاتہ نہیں کھولا،گروپ کی تمام6 ٹیمیں اب اتوار کو ایکشن میں ہوں گی، پاکستان کا مقابلہ نیدرلینڈز اور بھارت کا جنوبی افریقہ جبکہ بنگلا دیش کا زمبابوے سے ہوگا۔

گرین شرٹس کیلیے بہتر ہوگا کہ وہ نیدرلینڈز کو شکست دیں، بھارت اور بنگلہ دیش کی ٹیمیں بھی فتح حاصل کریں، پھر پاکستان امید کرے گا کہ نیدرلینڈز، زمبابوے اور بھارت، بنگلا دیش کو ہرائے، پھر پاکستان جنوبی افریقہ اور آخری میچ میں بنگلا دیش کو شکست دینے کے ساتھ ساتھ امید رکھے گا کہ زمبابوے کہیں بھارت کو بھی اپ سیٹ نہ کردے۔

پاکستان کی اگر مگر کا کافی حد تک انحصار اتوار کو بھارت اور جنوبی افریقہ کے میچ پر ہوگا، اگر اس میچ میں پڑوسی ملک جیتا تو امید کی کرن زیادہ روشن رہے گی، اگر پروٹیز نے بھارت کو شکست دی پھر پاکستان امید کرے گا کہ نیدرلینڈز جنوبی افریقہ کو اپ سیٹ کردے اور بھارت کو بھی زمبابوے سے شکست ہوجائے۔

اتوار کو ہونے والے میچز کے بعد صورتحال مزید واضح ہوجائے گی کہ پاکستان کی سیمی فائنل تک رسائی کیلیے کن امکانات کا ہونا ضروری ہے۔

ذرائع کے مطابق زمبابوے کے ہاتھوں شکست کے بعد پاکستان کیمپ میں شدید مایوسی کی لہر تھی،انہونی پر کئی کھلاڑی بالکل خاموش بیٹھے رہے،ٹیم مینجمنٹ کے ارکان ان کی ہمت بندھانے کی کوشش کرتے رہے،اعتماد کی بکھری کرچیاں جمع کرکے نیدرلینڈز کیخلاف میدان میں اترنا آسان نہیں ہوگا۔

مینجمنٹ، کپتان اور کھلاڑیوں کی گفتگو میں غلطیوں کی نشاندہی ہوئی ہے،ممکنہ تبدیلیوں پر بھی غور کیا گیا مگر بینچ پاور میں اتنے وسائل ہی نہیں کہ زیادہ اکھاڑ پچھاڑ کی جاسکے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔