جارجیا اور سندھ کو جڑواں ریاستوں کا درجہ دینے کی قرارداد منظور

  کراچی: امریکا پاکستان بزنس ڈیولپمنٹ فورم کے چئیرمین ذیشان الطاف نے کہا ہے کہ اسٹیٹ آف جارجیا اور سندھ کو جڑواں ریاستوں کا درجہ دینے کی قرار داد کی منظوری سندھ کی معاشی اور ثقافتی ترقی کے دروازے کھولے گی۔

انہوں نے کہا کہ امریکا پاکستان بزنس ڈیولپمنٹ فورم اٹلانٹا جارجیا کے صدر اور جارجیا ہاؤس آف نمائندگان کے رکن پہلے پاکستانی امریکی مسلم ممبر فاروق مغل نے سندھ اور جارجیا کو جڑواں ریاستیں قرار دینے کی قرار داد پیش کرکے پاکستان کے ساتھ محبت کی عظیم مثال قائم کی ہے۔

فاروق مغل نے بتایا کہ اس قراردار کی کاپیاں وائٹ ہاؤس، گورنر سندھ اور سندھ کے اراکین اسمبلی کو بھی بھیجی جارہی ہیں اور بہت جلد وہ جارجیا اسٹیٹ کے اراکین کے ساتھ پاکستان کو دورہ کریں گے اور سندھ کے گورنر، وزیر اعلٰی کو بھی جارجیا کے سرکاری دورے پر آنے کی دعوت دی جائے گی۔

انہوں نے کہا کہ ہماری کاوشوں کے نتیجے میں پاک امریکا سیاسی، معاشی اور ثقافتی تعلقات کو بھی نئی کامیابیاں ملیں گی۔

شیخ امتیاز حسین اور سید ناصر وجاہت نے امریکی ریاست جارجیا اور پاکستان کے صوبے سندھ کو جڑواں ریاستیں قرار دینے کی قرارداد پاس کروانے کے عظیم کارنامے پر فاروق مغل کو زبردست خراج تحسین  پیش کیا ہے۔