سرگودھا میں نجی اسکول کے ٹیچر کے تشدد سے طالب علم جاں بحق
اسکول ٹیچر کے تشدد سے طالب علم کی ٹانگ دو جگہ جبکہ کمر کی ہڈی ٹوٹ گئی تھی، پولیس نے ملزم کو گرفتار کرلیا
March 10, 2024
سرگودھا کے نواحی علاقے بدر رانجھا میں ٹیچر کے تشدد سے نویں جماعت کا طالب علم جاں بحق ہوگیا، پولیس نے چودہ گھنٹے کے اندر ملزم کو گرفتار کرلیا۔
تفصیلات کے مطابق بدر رانجھا کے علاقے میں نجی اسکول کے ٹیچر سمیع اللہ نے سبق یاد نہ کرنے پر نویں جماعت کے طالب علم کو بہیمانہ تشدد کا نشانہ بنایا جس کے نتیجے میں اُس کی ٹانگ کی ہڈی دو جگہ سے اور کمر کی ہڈی ٹوٹ گئی تھی۔
بچے کو اہل خانہ تشویشناک حالت میں بدر رانجھا کے سرکاری اسپتال لے کر پہنچے جہاں دوران علاج وہ زخموں کی تاب نہ لاتے ہوئے چل بسا۔
پولیس نے اہل خانہ کی مدعیت میں تھانہ مڈھ رانجھا میں مقدمہ درج کیا اور 14 گھنٹے کے اندر ملزم سمیع اللہ کو گرفتار کرلیا، جس نے ابتدائی تفیش میں بچے پر تشدد کا اعتراف کیا ہے۔
